Jowai, K’Lyngkot 07
Ka West Jaiñtia District Sports Association (WJDSA) ka la ïada bad pynksan halor ka rai jong ka ban sospon ïa ki rangïalehkai bad ki nongpynïaid jong ka Demthring Sports Club, da kaba pynpaw ba ïa baroh ki sienjam la leh da kaba pyrkhing bha katkum ka riti treikam (constitution) jong ka Association bad Football Rules hadien ka jingmih jong ka kynrum kynram ha ka por ba pynlong ïa ka semi-final jong ka Super Division na ka bynta ka 17th U Kiang Nangbah Memorial Trophy 2025.
Kane ka jingjia ka dei kaba la sdang naduh ka 5 tarik u Nohprah 2025, ha ka por ba la pynlong ïa ka semi-final kaba nyngkong hapdeng ka Khimusniang SC pyrshah ïa ka Demthring SC, ba la pynïaid da u National Referee ka AIFF u Bah Bulmi Phawa.
Katkum ka jingpynshai ka WJDSA, hadien ba la kut ka jingïalehkai ha ka por ba la buh, ki nongïalehkai ka Demthring lem bad u Coach bad Manager jong ki, ki la pynpaw pyrshah ïa ka rai jong u rephri. Ha kane ka jingpynpaw pyrshah, ki paidbah ki la rung sha madan lyngba ki khyrdop kiba plie kaba la pynmih ïa ka jinghuri hura hapoh ka madan.
Ka WJDSA ka la pynpaw ba la kynnoh ba ka la don ka jingpyndonkam da ki ktien khlem akor ha ka por ba ka jingïahuri hura bad ba u rephri um shym la lah ban ai ïa kano-kano ka jingpynshitom ne disciplinary card namar ka jingbun paidbah ki nongpeitkai kiba la wan rung be-aiñ sha madan.
Haba kyntait ïa ka jingkam jong ka Demthring SC ba ka jingwan rung jong ki paidbah ka la jia namar ka jingduna jong ki volunteer, ka WJDSA ka pynshai ba ka jingrung lyngba ki khyrdop ka long kaba la pynïaid da ki kyndon bad shah tang ïa ki nongpynïaid, ki dkhot Executive Member bad ki nongshah khot sngewbha.
Hapoh ka Article 12 jong ka riti pynïaid kam ka WJDSA, ki klob kiba pynïasoh ki don ïa ka jing-kitkhlieh halor ka jinglong ki nongïalehkai jong ki, ki nongpynïaid bad ki nongkyrshan, kata hapoh bad shabar jong ka jaka ïalehkai, bad ba ka long kaba donkam ban shim ïa ki lad jingïada kiba biang ban pynthikna ïa ka jingshngaiñ jong ki nongpynïaid ïa ka jingïalehkai.
Haba pynpaw halor ki jingkynnoh bamsap pyrshah ïa u rephri , ka WJDSA ka la kdew ïa ka Football Rule 15, kaba ong ba ïa ki rephri la thung tang da ka Referee Committee, kaba ki kynhun ba ïakhun kim don bynta ha ka rukom jied rephri ban pynïaid ïa ka jingïalehkai. Ka WJDSA ka la pynkynmaw shuh shuh ïa ka Rule 16 bad 17 kiba pynskhem ba ki rai jong u rephri halor ki mat jong ka jingshisha bad halor ka jingbuh por ki long kiba khatduh bad ym lah satia ban ujor.
Haba batai halor ka jingpynshitom, ka WJDSA ka la ong ba ka jingïalang jong ka Executive Council kaba la long ha ka 8 tarik u Nohprah 2025 ka la bishar bniah ïa ka kaiphod jong u rephri bad la pyndonkam ïa ka Football Rule 23(h), kaba bthah ban sospon ïa ki nongïalehkai bad pynshitom ïa ki klob lada jia ki khep ba ïadei bad ka jingkren tohmet ne thombor ïa ki rephri ne ki nongpynïaid jong ka synjuk.
“Ka synjuk kam don da kiwei pat ki lad, hynrei ban ïeng skhem halor ka rai jong ka katkum ka riti treikam bad ka Football Rules, ïa kiba la mynjur lang da baroh ki klob ba ïasoh bad kiba dang pyntreikam haduh kine ki sngi,” la ong ka kyrwoh na u General Secretary ka WJDSA u Bah Lammat OO Laloo ha ka shithi sha ki bor pynïaid District.
Ka synjuk ka la pynpaw ruh ba ka Referee Committee ka la pyntip sha ka WJDSA ba ym don uwei ruh u rephri uba kwah ban pynïaid ïa ka semi-final kaba la buh ban long ha ka 9 tarik Nohprah namar ka jingdon jong ki nongïalehkai kiba la shah kynnoh pynkheiñ aiñ. Namar kane, la hap ban pynkynriah noh ïa baroh artylli ki jingïakhun semi-final bad final ba la buh ban pynlong ha ka 13 tarik Nohprah 2025.
