Shillong, K’Lyngkot 07
Ka lahduh jong ka SSA Champions Cup, ka Nongkseh Sports Social and Cultural Club (SS&CC) ka la sdang da ka jingjop mynta u snem pyrshah ïa ka Gangtok Himalayan Sports Club da 2-1 kol ha ka lympung ïalehkai 11th All India Chief Minister’s Gold Cup International Football Tournament ha ka sngi Balang ha Jorethang, Sikkim
Kane ka long ka jingïalehkai kaba nyngkong eh shabar na ka ïing ïa kane ka kynhun ka nongbah kaba khlem pat shah rem ha baroh ki lympung ïalehkai jong u snem 2025 bad kaba la kiew kyrdan ruh sha ka Shillong Premier League 2026.
Haba phai sha kane ka jingïakhun, ki rangïalehkai ka Nongkseh hapoh ka jingïalam u Bah Rogestar Basaïawmoit kum u coach, ki la pyrshang ban ïakhun tyngeh naduh kaba sdang ha kaba la ïoh ban pynkhih jar tang ha ka minit kaba 10 lyngba u Shano Tariang, uba khlem pynlehnohei ïa ka kabu ksiar ba ïarap pynbuh da u Khrawkupar Jana. Kane ka kynhun ka la pynbud biang ïa ka kol kaba ar hashwa ban kut ka jingïalehkai jong ka kylla step lyngba u Kynsaibor Lhuid na ka bynta ban tam da 2-0 kol.
Hadien ba la bteng ïa ka kylla miet ka Nongkseh ka la pyrshang ban pynneh ïa ka rukom ïalehkai bad ban pyrshah ban pynurlong ïa ki kabu kiba ka la ïoh, hynrei kam shym la lah ban thep. Hynrei hadien katto katne por ka Gangtok Himalayan ka la lah ban pynphai kylla shi kol. Watla kane ka kynhun ka la ïoh ban thep, hynrei ki rangïalehkai ka Nongkseh ki la ïai neh skhem ha ka rukom ïalehkai bad ha kaba kut ka la lah ban khur ïa ka jingjop.
Te kumta ka Nongkseh kan ïakynduh pyrshah ïa ka Eastern Railway kaba na Kolkata ha ka pre-quarter final ka ban long ha ka sngi U Blei.
