Shillong, K’Lyngkot 07
Ka Lagan 2.0 ka la pynliem noh ïa ka Jersey Kings da 18 run na ka bynta ban khur jingjop ha ka lympung ïalehkai Second Division Cricket League 2025-26 ba la pynïaid da ka Shillong Cricket Association ha ka sngi Balang.
Ha kane ka jingïakhun kaba la long ha madan Urkaliar, ka Lagan ka la kam trai ban tied nyngkong ha kaba ka la kamai 212 run bad shah pynkhyllem 5 wiket ha ki 20 over. Kane ka la wan lyngba ka jingïalehkai bha u Rohit KR Rai uba la khyrwit ïa ka shiteng spah kaba 70 run na ki 30 bol lem bad u Subhash Kumar Rai, uba la tied 57 run na ki 33 bol. Katba u David Chamling Rai u la khur 3 wiket bad ïa ka 1 wiket la khur da u Sunil Gurung na ka bynta ka Jersey Kings.
Haba wan beh ïa ka thong, ka Jersey Kings ka la kamai tang 194 run bad shah pynhap 5 wiket ha ki 20 over. U Gopal Sunar u la khyrwit ïa ka shiteng spah kaba 50 run ha ki 25 bol bad u Bicky Raj Das u la ïoh 49 run na ki 40 bol. Katba u Anuj Kumar u la khur 2 wiket na ka bynta ka Lagan. Ïa ka nam Player of the Match la khur da u Rohit KR Rai.
