Shillong, K’Lyngkot 09
Ka lympung SSA Women’s Football league 2026 ka dang bteng ha ka 09 tarik Kyllalyngkot 2026, ha ka jingïakhun kaba nyngkong kaba la long ha ka por 10:30 mynstep ha madan SSA, ka Kharang SC ka la ïakhun pyrshah ïa ka Rangdajied United FC.
Ka Rangdajied United FC ka la ïoh thep 2 tylli ki kol lyngba ka Larihun Songthiang ha ka minit ba 23 bad da ka Judith Kharmuti ha ka 62 minit, ha kaba la jop noh ïa ka Kharang SC da 2-0 kol.
Ha ka jingïalehkai kaba bud ha ka por 12:30 ka shiteng sngi ha kajuh ka jaka, ka Umrynjah SC ka ïakhun pyrshah ïa ka Nongthymmai SC.
Ka Umrynjah SC ka la ïoh ban thep tang shi kol lyngba ka Esha Nongrum ha ka minit ba 25. Katba ka Nongthymmai SC ka la ïoh da 2 kol da ka Ribanhun Syiemlieh ha ka por 29 minit bad ka Lamlynti Lyngdoh Poilang ha ka 52 minit.
Ha kaba kut ka Nongthymmai SC ka la jop noh ha ka jingïalehkai da 2-1 kol ïa ka Umrynjah SC.
Ha ka jingïalehkai ka ba lai ha kane ka sngi ha kajuh ka jaka ha ka por 2:30 janmiet ka Lumparing SC ka la jop kput da 16-0 kol ïa ka Lawsohtun SC.
Ïa ki 16 tylli ki kol ka Lumparing SC la thep da ka Juviality Lyngdoh (9, 26, 29 & 54), ka Bahunlang Synrem (20), ka Ibadondor Nongsiej (33) (ka kol ba kum bakla thep hi da ka Lawsohtun SC), ka Saviniti Jyndiang (35), ka Iaphisha Marbaniang (37 & 57), ka Catherine Kharkongor (40, 52, 64 & 68), ka Lakyntiew Dohling (60 & 62) bad ka BanyllaShisha Nongkhlaw (66).
Ha ka 10 tarik Kyllalyngkot 2026 ki jingïalehkai ki ba dang bteng jong kane ka juh ka lympung ha ka juh ka jaka ki long ha ka por 12:30 shiteng sngi, ka Mawkasiang SC pyrshah ïa ka Lawsohtun SC, katba ha ka por 2:30 nohphai sngi ka PFR FA pyrshah ïa ka Lawei SC.
