Guwahati, K’Lyngkot 09
Ka Assam ka la thmu ban sakhi ïa ka jingwanpoi ka Trophy jong ka FIFA World Cup ba pawnam ha ka sien kaba nyngkong eh. Kawei na ki dak ba angnud bad burom bha ha ki jingïalehkai pyrthei, ka jingwan poi kane ka trophy ka dei ka dak kaba kongsan bha na ka bynta ka Assam, kaba buh ïa ka jylla ha ka ‘map’ phutbol jong ka pyrthei bad kaba wanrah ïa ka jingsngewtynnad kaba thymmai hapdeng ki nongkyrshan bad ki nongïalehkai samla kumjuh.
Ka myntri ka tnad ïalehkai bad ka tnad samla ka Nandita Gorlosa ka la pynbna ïa kane ha ka jingïalang bad ki nongthoh khubor kaba la long ha ka sngi Ba-ar ha conference hall jong ka Bhogeshwari Phukanani Indoor Stadium ha Dispur. Haba kren sha ki lad pathai khubor, ka myntri ka la pynthikna ba ka FIFA World Cup Trophy kan poi nyngkong eh ha Assam ha ka 13 tarik Kyllalyngkot.
Katkum ka jingïathuh jong ka myntri, ïa kane ka trophy la buh ban poi ha Guwahati ha ka por 10 baje mynstep ha ka 13 tarik u Kyllalyngkot bad yn buh ïa ka ha ka jingpyni paidbah ha Barsapara Stadium naduh ka por 3 baje janmiet nangne shakhmat, kaba ailad ïa ki nongkyrshan phutbol ban sakhi ïa ka khusnam phutbol kaba pawnam tam ha ka pyrthei.
Ka jingplie paidbah kan long ha ka por 8:30 janmiet, ban plie paidbah da u Myntri Rangbah ka Assam, u Himanta Biswa Sarma. Kaba kongsan ka long ba ka jingwanpoi jong kane ka trophy sha Assam ka ïahap bad ka jingwanphai biang jong ka sha India hadien ka jingïapher kaba 12 snem, kaba pynlong ïa kane ka jingïalang kaba kham kongsan shuh-shuh. Ka jingrung sha kane ka jingïalang kan long khlem jingsiew, ban pynthikna ïa ka jingïashim bynta kaba heh jong ki paidbah.
Ban pynshit pynshngaiñ, yn pynlong ïa ka prokram kolshor kaba itynnad ha madan jong ka Coke Studio naduh ka por 3 baje janmiet, ha kaba yn don ki jingshad da ki nongrwai ba pawnam kum u Shankuraj bad u Rito Riba, bad kiwei-kiwei, la pynbna ka Myntri Gorlosa.
Kane ka jingïaid lynti wan poi jong ka FIFA World Cup Trophy Tour ha Assam la khmih lynti ba kan ai mynsiem ïa ka pateng kaba thymmai jong ki ‘riewieit phutbol, ban pynkhlaiñ ïa ka kolshor ïalehkai naduh tynrai, bad ban pynskhem biang ïa ka jinglong ba pawnam jong ka jylla ha ka kam ïalehkai jong ka ri India.
