Mawkyrwat, K’Lyngkot 09
Ka Dorbar Shnong Marshilong ha ka 8 tarik u Kyllalyngkot, 2026 ka la ïoh ban pynkut noh ïa ka lympung ïalehkmen kaba tip kum ka ‘Marshilong Winter Festival 2026’ ba la pynlong ha Madan Mawhiang, Marshilong, South West Khasi Hills District.
U kongsan ha kane ka sngi u dei u Bah Renikton Lyngdoh Tongkhar uba dei u MLA ka Mawkyrwat Constituency ha ryngkat ka jingdonlang naduh u Bah G. Thongni uba dei u Myntri Shnong Marshilong uba la pynïaid ïa ka jingïalang lem bad ki ‘riew rangbah, ki longkpa, ki longkmie, ki samla bad ki hep kiba rit jong ka shnong Marshilong.
Ïa kane ka Winter Festival la ïoh ban pynlong ha ka 7 bad 8 tarik u Kyllalyngkot 2026 bad ki jinglehkai kiba la ïoh ban pynlong ki long ka Shad Sngi, ka jingïasiat Khnam, Rwai Phawar, ïalehkai Mawpoiñ, Traditional Food Fest, Football bad ka Fancy Dress.
Haba kut jong ki jait jingïalehkai, la ïoh ban sam ïa ki khusnam sha baroh ki nongjop da u kongsan bad ki nongjop ki long ha ka jingïakop siat khnam ba para marwei la jop da u Bah Prospersik Wanniang, katba ha ka jingïakop siat kynhun pat la jop da ka kynhun jong u Bilerian Thongni.
Ha ka jingïalehkai kynjatbol la jop da ka Banangroi Football Club da 1-0 kol pyrshah ïa ka Maitlongtei Football Club.
Ha ka rwai phawar la jop da u Bah Anthony Lyngkhoi.
Ha ka Mawpoiñ la jop da ka Dong Mawhiang. Nangta, ha ka jingïakop pyni riam tynrai (Fancy Dress) la jop da u Herbertdonsil Lyngdoh.
