Shillong, K’Lyngkot 09
Ka Motor Sports Club of Meghalaya ha ryngkat ka jingïatreilang, ka Laitlyngkot Sports Club ,kan pynlong ïa ka jingïakop ñiah kali Off-Road Trophy 2.0 ka ban sa long ha ka 15 haduh 17 tarik u Kyllalyngkot ha Laitlyngkot, Umstew Lamlyer bad Wahumïew.
Haba kren sha ki lad pathai khubor u Samla Jeffery Kharsyntiew Secretary (MSCM) u la ïathuh ba ka kynhun ka khmih lynti ba ki nongïashimbynta kin poi 40 haduh 60 ngut na kylleng ki Jylla ka Thaiñ Shatei Lam Mihngi.
U la ïathuh ruh ba kin don ruh ki nongïashimbynta na Kerala ha kane ka Off-Road Trophy 2.0
U la ong ka jingthmu jong ka kynhun ba ka pynlong ïa kane ka jingïalehkai ka long ban kyntiew ïa ka Motor Sports hapoh ka Jylla Meghalaya khamtam ba ki riewdonsap kin ïoh ban pynpaw ïa ka sap ha kajuh ka por ka ban long ruh ka jingai mynsiem ban pynshlur ïa ki nongïalehkai ba leit ïakhun ha ki jingïakop ba ha ka ri bad sha kiwei ki ri ka pyrthei kumjuh.
U samla Jeffery u la pynpaw ïa ka jingsngewnguh ïa ka Sorkar Jylla Meghalaya lyngba ka tnad jngohkai pyrthei kaba la ai jingkyrshan ha ka ban pynlong ïa kane ka jingïakop.
Kan don lai jait ka jingïakop bad yn don lai ngut ki nongjop ha kawei-kawei ka kyrdan bad ki nongjop kin ïoh ïa ka cash prize.
