New Delhi, K’lyngkot:
katkum ki khubor, la iathuh ba napdeng ki dkhot jong ka jhad kit umphniang jong ka Russia ba la kurup da ka US, 3 ngut ki dei ki nong India kiba long ki dkhot nongtrei ha katei ka jhad jong ka Russia.
Ka tnat kam bar ri jong ka Russia, ka la ong ruh ba ïa ki jingtip shaphang ka jhad kit mar jong ka Marinera, kaba la ju tip mynshwa kum ka Bella 1, kaba la shah kurup ha ka Sngi Balang da ki shipai rud duriaw jong ka US ha North Atlantic, la pynpoi bunsien sha America.
La iathuh ba ki nongtrei jong ka Marinera, ki don 17 ngut ki nong Ukraine, 6 ngut ki nong Georgia, lai ngut ki nong India bad arngut ki nong Russia.
La ap ia ka jingpynthikna kaba pura na ki bor synshar jong ka ri India.
“Ngi ai jingmut ïa ka ri America ban sdang biang ïa ka jingbud ryntih ïa ki kyndon bad ki nongrim ba kongsan jong ka jingïaid lynti ha duriaw ha ka pyrthei bad ban sangeh noh mardor ïa ki kam be-aiñ jong ka pyrshah ïa ka jhad Marinera bad kiwei kiwei ki jhad kiba leh ïa ki kam kiba kohnguh ïa ka aiñ ha ki duriaw bah,” ong ka tnad bar ri ha ka kyrwoh.
Ka Moscow ka la ong ba ka shim ba ki jingkdew jong ka US shaphang ka “aiñ pynjari kyndon” jong ka ri, ki long ki bym don nongrim.
“Ki jingkren jong ki katto katne ki heh jong ka US ba ka jingshimti ïa ka Marinera ka dei ka bynta jong ka buit kaba kham jylliew ban pynskhem ïa ka jingsynshar khlem pud jong ka Washington halor ki marpoh khyndew jong ka Venezuela ki long kiba sngewsih haduh katta katta. Ngi kyntait jur ïa kum kine ki jinglong nongsynshar thymmai,” la pynpaw ka tnat kam bar ri.
“Ki lad khanglad ba shiliang da ka US, bad kumjuh ruh kiwei pat ki ri Sepngi, ki long kiba be-aiñ bad kim lah ban pynshisha ïa ki jingpyrshang ban seng ïa ka bor synshar bad khamtam eh, ban kurup ïa ki lieng ha ki duriaw bah,” ka la ong.
Da kaba dawa ïa ka jingleh hok bad burom ïa ki nongtrei jong ka, ka kyrwoh ka la ong: “Ngi pynkynmaw biang ïa ka jingdawa jong ngi ba ka US kan pynthikna ïa ka jingleh hok bad burom ïa ki nongshong shnong jong ka Russia kiba kynthup ïa ki nongtrei jong ka liengsuiñ, ban bud ryntih ïa ki hok bad ki jingmyntoi jong ki, bad ban ym buh jingeh ïa ki ban wanphai kloi sha la ka jong ka ri.” Ka la pynpaw ruh ïa ka jingsngewkhia kaba jur ïa ka jingpyndonkam bor shipai jong ka US pyrshah ïa ka jhad kit umphniang, ïa ki jingtip ba pura shaphang jong ka la pynsngew sha ka.
“Ka Marinera, kaba ha u Nohprah 24, ka la ioh jingbit shipor ban iaid hapoh ka lama jong ka Russia katkum ka ain jong ka pyrthei bad ki ain jong ka Russia, ka la iaid lyngba da ka jingsuk ia ki um jong ka pyrthei ha North Atlantic, kaba leit sha kawei na ki kad liengsuin jong ka Russia,” la ong ka tnad kam bar ri.
Ka sorkar US ka la shah ai bunsien ïa ki jingtip kiba lah ban shaniah, kynthup na ka tnad kam bar ri jong ka Russia, shaphang ka jingsdang jong ka lieng na Russia bad ka jinglong riew paidbah jong ka, ka la pynskhem.
