Shillong, K’Lyngkot 11
Ka Macclesfield FC kaba shim bynta ha ka ‘sixth-tier’ jong ka National League North, ka la pynshaïong ïa ka kynhun ïalehkai ba khlaiñ bor jong ka Premier League, ka Crystal Palace da 2-1 kol ha ka sngi Saitjaiñ.
Ym pat ju jia mynno mynno ruh ba ka kynhun na ki lympung ïalehkai kiba kham hapoh ka lah ban pynliem ïa ka kynhun la bat teng ïa ka nam lahduh ha ka FA Cup ha u snem 1909. Ka jingïapher hapdeng katei ka kynhun jong ka Premier League Palace bad ka Maccles-field kaba ïalehkai ha ka National League North ka long haduh 117 kyrdan bad ka long kaba heh tam ba ka la lah ban jop ha ka khana ïalehkai jong kane ka lympung ïalehkai kaba la neh 153 snem.
U kapten ka kynhun u Paul Dawson u la pynkhih jar nyngkong hashwa ba u Isaac Buckley-Ricketts un thep ïa ka kol kaba ar.
Kane kam shym la long tang ka jingsngew -sih, ka dei ka khyllipmat kaba don jingmut bha na ka bynta ka klob kaba la sangeh noh ha u snem 2020, kaba la shah pynbor ban pynkylla hadien ba la pynduh noh ïa ka namar ki ram ba kam shym la lah ban siew.
Ym pat dap shibnai naduh ka jingïap ba sngewsih jong u rangïa-lehkai shakhmat ba dang 21 snem ka rta u Euan McLeod, ka Maccles-field ka la lah ban ai ïa ka jingjop ha kane ka lympung ïalehkai phutbol.
“Ngam shym la poi pyrkhat ba kan wan urlong,” la pynpaw u manager u John Rooney da ka jingkmen. “Hynrei ha ka FA Cup ka lah ban wan kano kano ka jingjia.”
Ka Crystal Palace, kaba la pynïakhun ïa ki rangïalehkai ka England kata u Marc Guehi bad u Adam Wharton. Hynrei ka free-kick ba la ïoh da u Yeremy Pino hashwa ban wai ka la lah ban pynphai kylla shi kol hashwa ban mad ïa ka jingsah rem.
U manager ka Palace u Oliver Glasner, um shym la lah ban ai kano kano ka jubab halor kane ka jingshah rem. “Ngam lah ban ai kano kano ka jingbatai ïa kaei kaba nga la ïohi.”
Ha kawei pat ka jingïakhun, ka Wolves ka la jop da 6-1 kol pyrshah ïa ka Shrewsbury.
