Washington, K’lyngkot:
Ha ka jingpynbna kaba kham sngew kyndit, la ong ba u President ka US, u Donald Trump, ha ka Sngi Balang u la ong ba ka Venezuela nangne sha khmat ka dei ban thied tang ia ki tiar bad ki mar ba la pynmih da ka US, da kato ka pisa bad ka jingioh kaba ki iohnong na ka jingkhaii umphniang ba la iateh thymmai.
Katkum ka jingpynbna ba la pyllait da u Trump ha ka ‘Truth Social’, u la ong ba ka ki jingthied kin kynthup ia ki mar rep jong ka ri America, ki dawai, ki tiar sumar bad ki tiar ban pynbha ia ka bording bad ki jaka pynmih bording, nalor kiwei kiwei.
“Nga dang shu ïoh jingtip ba ka Venezuela kan sa thied TANG ïa ki mar ba la shna da ka ri America, da ka pisa kaba ki ïoh na ka jingïateh kular umphniang ba thymmai jong ngi. Kine ki jingthied kin kynthup, nalor kiwei pat kiei kiei, ïa ki mar rep ba la shna da ka ri America, bad ki dawai ba la shna da ka bor ding, ki tiar sumar, bad ki tiar ban pynbha ïa kiwei pat ki mar rep. Ka Venezuela ka kular ban leh ia ka kam khaii bad ka ri America kum ka paralok ba kongsan jong ki – Ka jingjied kaba stad, bad ka kam kaba bha shibun na ka bynta ki paidbah ka Venezuela, bad ka ri America, Khublei shibun ia ka jingshimkhia jong phi ia kane ka kam!”, u la ong ha ka Truth Social.
Katei ka jingkren jong u Trump, ka wan hadien katto katne sngi, ba ka US, ka la pynlong ïa ka “jinghiar thma kaba heh” ha ka nongbah jong ka Venezuela, ha Caracas, na ka bynta ban kem ïa u President barim jong katei ka ri, U Nicolas Maduro, uba mynta bad ka tnga jongu, ka Cilia Flores, ha ka sngi Saitjaiñ.
U Maduro bad u Flores ki la shah pynher liengsuiñ shabar jong ka ri ha ka jingïatreilang jong ki tnad syntiat bad ki bor jong ka aiñ jong ka US. La pynngat ïa ki halor ka jingkynnoh ba ki dei ki “khaii drok bad ki jingthmu pynïap drok” ha ka Southern District jong ka New York, bad mynta ki dang ïakynduh ïa ka jingbishar.
