Shillong, K’Lyngkot 11
Ka Metallica Rising bad ka Cluster CC ki la khur ïa ka jingjop ha ka Second Division Cricket League 2026 ba la pynïaid da ka Shillong Cricket Association ha ka sngi U Blei.
Ha kane ka jingïakhun kaba la long ha Urkaliar, ka Metallica Rising ka la pynliem noh ïa ka Golflinks XI Star da 164 run. Ka Metallica Rising kaba la kam trai ban tied nyngkong, ka la kamai 193 run bad shah pynkhyllem 8 wiket ha ki 20 over. U Kumar Chettri u la tied 53 run na ki 47 bol bad u Subham Mishra u la ïoh 34 run na ki 16 bol. Katba u Abid Khan u la khur 3 wiket bad ïa ki 2 wiket la khur da u Md Ajharuddin.
Haba wan beh ïa ka thong, ka Golflink Xlstar ka la shah pynkhyllem badoh ki nongtied bad kamai tang 29 run ha ki 11.4 over. U Md javed u la tied tang 7 run na ki 22 bol bad u Pritam Singh u la ïoh 5 run na ki 8 bol. Katba u Bishal Chettri bad u Yogendra Singh ki la khur mar 3 wiket na ka bynta ka Metallica. Ïa ka nam Player of the Match la khur da u Yogendra Singh.
Haba phai sha kawei pat ka jingïakhun kaba ar, ka Cluster ka la jop da 103 run ïa ka Masonic. Ka Cluster kaba la shimti ban tied nyngkong ka la kamai 205 run bad shah pynhap 8 wiket ha ki 20 over. U Basant Chettri u la tied 55 run na ki 21 bol bad u Azad Qureshi u la ïoh 32 run na ki 21 bol. Katba u Niraj Rana bad u Bunny Sharma ki la khur mar 2 wiket.
Haba wan beh ïa ka thong, ka Masonic ka la kamai tang 102 run bad shah pynhap 10 wiket ha ki 19.2 over. U Bikash Chettri u la tied 30 run na ki 34 bol bad u Andrew Sangma u la ïoh 13 run na ki 14 bol. Katba u Basant Chettri u la khur 4 wiket bad ïa ki 2 wiket la khur da u Gyandeep Kachari. Ia ka nam Player of the Match la kh ur da u Basant Chettri.
