Shillong, K’Lyngkot 11
Ka shi kol ba la thep da u Hardly Cliff Nongbri ka la biang pura ïa ka lahduh jong ka SSA Champions Cup, ka Nongkseh Sports Social and Cultural Club (SS&CC) ban jam sha ka quarter final ha ka lympung ïalehkai 11th All India Chief Minister’s Gold Cup International Football Tournament.
Kane ka la wan hadien ba ka la lah ban pynliem noh ïa ka Eastern Railway kaba na Kolkata da 1-0 kol ha ka jingïalehkai pre-quarter kaba la long ha ka sngi U Blei ha Jorethang, Sikkim.
Kane ka long ka jingïalehkai kaba ba ar shabar na ka ïing ïa kane ka kynhun ka nongbah mynta u snem bad ka la long ka kynhun kaba khlem pat shah rem ha baroh ki lympung ïalehkai jong u snem 2025 bad kaba la kiew kyrdan ruh sha ka Shillong Premier League 2026.
Kumba ka paw kane ka kynhun ïalehkai ka Nongbah ka la lah ban pynpaw ïa ka jingtbit naduh kaba sdang ka jingïakhun kaba nyngkong ha kba ka la jop ïa ka Gangtok Himalayan Sports Club da 2-1 kol bad ha kane ka jingïakhun pre-quarter final ka la lah ban khur biang ïa ka jingjop bad ban pynthikna ban rung syndon sha ka quarter final. U Shano Tariang u la long u rangïalehkai ba kynsai bad u la khur ruh ïa ka Man of the Match.
Te kumta ka Nongkseh kan ïakynduh pyrshah ïa ka kynhun ïalehkai I-League kaba na Manipur, ka Neroca ha ka quarter final ka ban long ha ka 16 tarik mynta u bnai.
