Shillong, K’Lyngkot 11
Ki nongïalehkai siat suloi ka Jylla hapoh ka lama jong ka Shooting Association of Meghalaya (SAM) ki la ïoh rung ha ka thup jong ka ‘Renowned Shot’ ha ka 68th National Shooting Championship Competitions, katba uwei u la ïoh rung sha ka jingpyrshang (trial) ka ban sa long shen.
Kane ka la wan hadien ba ki la lah ban pynpaw ïa ka jingtbit ha katei ka lympung ba la pynïaid da National Rifle Association of India, kaba la sdang naduh 11 tarik u Nohprah 2025 haduh 4 tarik mynta u bnai ha nongbah Delhi bad ha Bhopal.
Na ka liang ka SAM ka la phah ïa ki nongïalehkai kiba kynthup lang ïa kiba la ju mlien ban leit shim bynta bad kiba don sap kynthei bad shynrang ha ka Rifle bad Pistol.
Ha ka Rifle ki don 13 ngut ki nongïalehkai kiba kynthup ïa 7 ngut ki shynrang bad 6 ngut ki kynthei.
Napdeng kine ki don 9 ngut kiba la shah kynthup hapoh ka ‘Renowned Shot’ ïa kaba la pynbna da ka National Rifle Association of India ïa kito ki nongsiat kiba la lah ban siat palat na kaba la buh. Ha ka 10 meter ki long u Hamebansuklang Mylliempdah, Dennyson Kyrsian, Akash Sinha, S. Rebecca, Daaihun Ïaiphniaw, Litina Aye bad u Oykim Hek, uba la ïoh rung sha ka jingpyrshang (trial). Katba ha ka 50 meter ki kynthup ïa u Hamebansuklang Mylliempdah bad u Dennyson Kyrsian.
Ha ka Pistol, ka Meghalaya ka la mihkhmat da 11 ngut ki nongsiat kiba kynthup ïa 5 ngut ki shynrang 6 ngut ki kynthei.
Napdeng kine, 5 ngut ki nongsiat kiba la shah kynthup hapoh ka ‘Renowned Shot’. Kine ki long ha ka 10 meter ki kynthup ïa u Mawdaker Marweiñ, Da I LabyntaRyntathiang, Manika Pasi bad ka Shirley Mary Kharbuli. Ha ka 25 meter (Sports Pistol) ki long ka Balarishisha Rani bad u Mawdaker Marweiñ
Ha katei ka lympung ki la don 17,530 ngut ki nongïalehkai kylleng jong ka ri kiba la wan shim bynta ha la ki jong ki jingïakop siat kata ka Rifle, Pistol bad Shotgun. Ha ka Rifle ki la don 7061 ngut, ha ka Pistol ki don 9381 ngut bad ha ka Shotgun ki don 1088 ngut ki nongshim bynta.
