Shillong, K’Lyngkot 11
Ka Mawkynroh SC ka la bteng ban lamkhmat ha ka Group-B jong ka First Division Football Tournament 2025-26 ba la pynïaid da ka Tyrsad Area Sports Association (TASA), hadien ba ka la pynliem noh ïa ka Mawponghong SC da 3-1 kol ha ka sngi Saitjaiñ.
Ha katei ka jingïalehkai kaba la long ha madan Mawlum kaba ha Tyrsad, baroh ar ki kynhun ki la ïakhun tyngeh naduh kaba sdang ha kaba ki la ïathep mar shi kol ha ka kylla step. Tang mar iasdang ka jingïalehkai ka Mawkynroh ka la pynkhih jar nyngkong lyngba u Jesswellborn Kharbani ha ka minit kaba 2, hynrei ka Mawponghong ka la pynphai kylla lyngba u Justlywell Jala ha ka minit kaba 15.
Hadien katto katne por ba la bteng ïa ka jingïakhun jong ka kylla miet, ka Mawkynroh ka la ïoh ban thep biang sa ar kol lyngba u Presharsing Lyngkhoi (52) bad u Toberwell Marngar (62) na ka bynta ban khur syndon ïa ka jingjop.
Lyngba kane ka jingjop, ka Mawkynroh ka la kamai 10 poiñ na ki saw sien ïakhun bad ka don ha ka thong ban rung sha ka semi final ha kane ka lympung, katba ka Mawponghong ka dangsah ha ka kyrdan ba-ar bad 7 poiñ.
Haba phai sha kawei pat ka jingïa-khun jong ka Group-A hapdeng ka Maw-dngong SC bad ka Rangshangkham SC ki la ïasam mar shi poiñ hadien ba kim shym la lah ban thep kol haduh kaba kut ka jingïalehkai.
Te kumta lyngba kane ka jingïakhaid, kine baroh ar ki kynhun ki la kamai mar 6 poiñ.
Kane ka lympung kan bteng biang ha ka sngi Balang (14 tarik) hapdeng ka Nongspung AYSCSA pyrshah ïa ka Perkseh SC ha ka por 11:30 mynstep bad ka Umkseh SC ïa ka Kyrphei SC ha ka por 2 baje nohphai sngi.
