Shillong, K’Lyngkot 11
Ka Pay For Right Football Academy (PFRFA) ka la thikna ban jam sha ka quarter final ha ka lympung ïalehkai Women’s Football League 2026, hadien ba ka la lah ban pynliem noh sa ïa ka Lawei SC da 1-0 kol ha ka sngi Saitjaiñ ha SSA Stadium kaba ha First Ground, Polo.
Kane ka nam jop ka la wan urlong lyngba ka shi kol ba la thep da ka Aitihun Majaw ha ka minit kaba 56 na ka bynta ban ïai bteng ïa ka jinglamkhmat ha ka Group-B.
Kum ba ka paw ha kane ka lympung ïalehkai ba la pynïaid da ka Shillong Sports Association (SSA), ka PFR ka la long ka kynhun kaba khlem pat shah rem na ki lai sien ïakhun ha kaba ka la jop ïa ka Lawsohtun da 12-1 kol bad kumjuh ïa ka Mawkasiang da 8-0 kol.
Te kumta lyngba katei ka jingjop kaba lai, ka PFR ka la kamai 9 poiñ. Ïa ka kyrdan ba-ar la bat da ka Lumparing (6 poiñ) bad balai ka Lawei (3 poiñ).
Katba ka Mawkasiang bad ka Lawsohtun ki la don ha ki kyrdan ba shatrai bad ha ka jingïalehkai ha ka sngi Saitjaiñ ki la ïasam mar shi poiñ hadien ba kim shym la lah ban thep kol haduh kaba kut ka jingïalehkai.
Ha ka lah sngi U Blei ki jingïalehkai ha ka por 10:30 mynstep kin long hapdeng ka Lumparing SC pyrshah ïa ka Mawkasiang SC, kumjuh ha ka por 12:30 mynsngi ka Laitkor SC ïa ka Umrynjah SC bad ha ka por 2:30 ka Nongrim Hills SC kan ïakynduh pyrshah ïa ka Kharang SC.
