Washington, K’lyngkot:
U President ka United States, u Donald Trump, ha ka Sngi U Blei, u la pynbna ia ka jingthmu jong u ban iakren bad u heh spah ka ri- u Elon Musk, halor ka jingwanrah biang ia ka ‘Internet’ hapoh Iran, ha kaba ki bor pyniaid ka Iran ki la khang bad pyrkhing noh namar ka jingjur jong ki jingiakhih pyrshah sorkar hapoh katei ka ri.
U Trump u la ong ba u Musk u long uba shemphang bha ha katei ka laiñ bad kumta u shaniah ha ka jingstad jong u ban leh ia kane ka kam.
Kumta, la ong ba u Musk bad u Trump, ki don hapdeng ka jingiadei ka bym ithuh- ithaw bad teng-teng ki iakynduh kam, teng-teng pat ki ia jngai wat hadien ka jingtheh spah jong utei u heh spah sha u Trump naka bynta ka ilekshon President jong u Trump ha u snem ba la dep.
Kine ki arngut ki la poi sha ka jingïakynad ha u snem ba la dep hadien ba u Musk u la pyrshah ïa ka aiñ khajna ba la soi da u Trump, hynrei kitei ki arngut, la paw ba ki la ia bteng biang ïa ka jingïadei jongki, da kaba ïabam ja miet lang ha ka jaka jngohkai pyrthei jong u Trump ha Mar-A-Lago ha une u bnai.
Watla katta, la ong ba u Musk bad ka tnat SpaceX kim shym la ai jubab mardor halor ka jingkyrpad jong nongthoh khubor ban ai jubab ne ai jingmut haba iadei bad kane ka mat ba la pynpaw da u President ka US.
Ha u snem 2022, u Musk u la batai ïa u Trump kum u president u bym bit namar ka jingheh ka rta jong u kum ka jingkynthoh ïa u Trump uba la khot ïa u kum u “nongrwai thok”. Katba ka jingïadei hapdeng kine ki arngut ka la nang kham sngem, ha u bnai Jylliew 2025 pynban, u Trump u la pynjur ïa ka jingïakynad, da kaba ong ha ka jingïalang ha Michigan, “Lehse ka la dei ka por ba un leit phai biang sha ka jaka ba u wan”.
