Shillong, K’Lyngkot 13
Ka Mia Blichfeldt jong ka Denmark ha ka sngi Ba-ar ka la kynthoh halor ka jinglong jingman jong ka jaka ïalehkai ha IG Stadium, da kaba ong ba ka jingpynkylla ïa ki hall la leh tang khyndiat ha kaba kam long kaba koit ba khiah bad ka bym biang na ka bynta ki nongïalehkai.
Ka la kyntu ïa ka synjuk ïalehkai jong ka BWF ba kan tuklar na ka bynta ban kyntiew ïa ka jinglong jingman shwa ka World Championships.
Ka Blichfeldt kaba la rung sha ka wat kaba ar jong ka India Open Super 750 kaba dang ïaid mynta, ka la ong ba ka la kyrmen ba ka jingpynkylla ïa ka jaka kan wanrah ïa ki jingkylla kiba lah ban ïohi hynrei ka la lap ba ki jinglong jingman bunsien kim shym la kylla.
“Nga kyrmen ha ka jingshisha ba kan kham bha ban ïa kawei pat ka hall”, la ong ka Blichfeldt. “Nga tharai ba ka dangjakhlia bha bad shisha kam long kaba koit ba khiah na ka bynta baroh ki nongïalehkai.”
Katei ka nongïalehkai kaba na Denmark ka la ong ba ka jingkhriat bad ka jingbym khuid ka wanrah ka jingeh na ka bynta ka jingpynkhreh ïa ki nongïaleh -kai. “Kam dei ka jingpynkhreh kaba bha na ka bynta ka nongïalehkai kaba hap ban leit sha madan, ban ïaid stet, bad ban leit sha ki jingïapher”, ka la bynrap.
“Nga tip ba baroh ki leh katba lah ban pynbha ïa ki jinglong jingman na ka bynta ki nongïalehkai, hynrei nga pyrkhat ba ka dang don ka lad ban pynurlong.”
Shuh shuh ka Blichfeldt ka la kynthoh ïa ki jinglong jingman ha KD Jadhav Hall ba ka long ka bym koit bym khiah bad ki bym lah ban pdiang” ha ka por ba ka la pynlong ïa ka jingïakhun ba khatduh jong ka India Open ha u Kyllalyngkot. Ka la ong ba ki jingsngewkhia jong ka ki pyni ia ki jingsngewkhia kiba ka la pynpaw ha katei ka jaka ha u snem ba la dep, da kaba kdew ba tang khyndiat eh ka la kylla naduh kata ka por.
“Hynnin ka sngi haba nga la wan ban kilanmet, ki don ki sim kiba her kylleng bad kiba leit dih um ha ka madan. Kata ka long shisha ka bym koit bym khiah bad kam long kaba ïahap.”
Haba kyntu ban tuklar na ki nongpynïaid bad ki nongïalam ka Badminton World Federation, ka Blichfeldt ka la ong ba dei ban pynneh pynsah ïa ki kyrdan treikam khnang ban ai jingïada ïa ki nongïalehkai.
