Shillong, K’Lyngkot 13
Ki khynnah ka Don Bosco Sports Academy (DBSA) sa shisien ki la ïoh ba kin rah biang ïa ka nam lahduh ka lympung ïalehkai (L) Josephine Kharkongor U-14 Football, hadien ba ki la lah ban pynliem noh ïa ka Josephine Kharkongor FC da 4-1 kol, ha ka phainal kaba la long ha ka sngi Ba-ar ha madan ïalehkai Performance Centre jong ka Rangdajied United FC kaba ha Pynthorbah.
Kumban shu pynkynmaw ba ïa kane ka lympung la plie ha ka 7 tarik ka taïew kaba la dep bad ba la wan ïashim bynta da 8 tylli ki kynhun.
Ïa kane ka jingïakhun la wan ban sakhi lang da u Rangbah Shnong ka Pynthorbah ryngkat ki khlur ïalehkai ba la paw ka Jylla kum u Bah Eugeneson Lyngdoh, Bah Ailad Kynta, Aiborlang Khongjee, Bah Arnest Lyngkhoi, Redeem Tlang, u coach ka kynhun ïalehkai phutbol ka Jylla u Bah Khlaiñ Pyrkhat Syiemlieh bad kiwei.
Na ka liang ka ïing ka sem la wan ban sakhi lang da Fr. Anthony Kharkongor, Principal St. Anthony’s Higher Secondary School, Bah Agustine Kharkongor, Kong Patri-cia Kharkongor.
Ha kaba kut jong ka la don ka jingsam ïa ki khusnam ba kynthup ïa ki khusnam ba kyrpang, kaba ha kane ka kynti ba mynta, u Hame -banskhem Marbaniang na ka DBSA u la ïoh ban rah ïa ka nam Best Player, katba ka nam Best Goal-keeper ka leit sha u Mewanskhem Kharpuli ka DBSA bad ka nam Top Scorer ka leit sha u Nangmanbha, uba la ïoh ban thep baroh haduh 8 kol.
Hadien kane ka la don ruh ka jingsam ïa ki takma, ki trophy bad ka song pisa sha baroh artylli ki kynhun ba la ïashim bynta lang ban sam ïa ki da ki riew pawkhmat kiba la kdew haneng.
