Shillong, K’Lyngkot 13
Ka Real Madrid ka la bujli noh ïa u coach u Xabi Alonso da u manager jong ka kynhun (team B) u Alvaro Arbeloa ha ka lah sngi U Blei.
Kat kum ka kyrwoh ba la pyllait da ka Madrid, la ong ba u Alonso u la mih noh da ka jingïasngew-thuh jingmut lang.
Kane ka jingpynbna ka la wan hadien ba ka Madrid ka la shah rem ha ka Barcelona da 3-2 kol ha ka jingïakhun final jong ka Spanish Super Cup kaba la long ha Saudi Arabia.
“Ka Real Madrid ka kwah ban pynbna ba da ka jingïasngewthuh jingmut lang hapdeng ka klob bad u Xabi Alonso, la rai ban pynkut noh ïa ka por jong u kum u coach jong ka kynhun (first team),” ong ka Madrid. “U Xabi Alonso un rah ïa ka jingieit bad jingsngewnguh jong baroh ki nong Madrid namar ba u dei u rangïa-lehkai ba paw jong ka Real Madrid bad u la ju mihkhmat ïa ki jinglong ba kordor jong ka klob jong ngi. Ka Real Madrid kan long beit ka ïing jong u.”
Ka klob ka la ai khublei ïa u Alonso bad ki nongïarap jong u na ka bynta ka jingtrei shitom bad ka jingaiti lut jong ki ha kane ka por baroh kawei bad kitbok kitrwiang ïa ki ba kin ïoh ïa ka jingjop ha ka kyrdan ba thymmai jong ka jingim jong ki.”
Kumba long u Alonso, u Arbeloa u dei u rangïalehkai ba rim jong kane ka kynhun ïalehkai na Spain.
