Shillong, K’Lyngkot 13
Ka Nongthymmai SC ka la ïasam mar shi point bad ka Mawshbuit SC ha ka lympung ïalehkai Women’s Football League 2026 ba la pynïaid da ka Shillong Sports Association (SSA), hadien ba ki la ïakhaid mar 2-2 kol ha ka sngi Ba-ar.
Ha kane ka jingïakhun jong ka Group-A kaba la long ha SSA Stadium Polo, ka Nongthymmai ka la ïoh ban pynkhih jar tang mar ïasdang ka jingïalehkai kata ha ka minit kaba 3 lyngba ka Isha Warjri, hynrei tang hadien hynriew minit ka Mawshbuit ka la pynïakhaid kylla lyngba ka Daïahun Marbaniang.
Hadien ba la bteng ïa ka jingïakhun jong ka kylla miet, ka Isha ka la thep biang sa shi kol na ka bynta ka Nongthymmai ha ka minit kaba 51. Hynrei ka Mawshbuit ka la lah ban pynphai kylla lyngba ka Phibansharai Umdor ha ka minit kaba 68 na ka bynta ban ïakhaid mar ar kol.
Da kane ka jingïakhaid ka Nongthymmai ka dangsah ha ka kyrdan balai bad kamai 4 point, katba ka Mawshbuit ka dangkamai tang shi point na ki lai sien ïakhun.
Haba phai sha kawei pat ka jingïakhun jong ka Group-C hapdeng ka Rangdajied United bad ka New Challenger SC ki la ïakhaid hadien ba kim shym la lah ban thep kol haduh kaba kut ka jingïalehkai.
Watla ki la kamai mar 7 point na ki lai sien ïakhun, hynrei lyngba kane ka jingïakhaid ka Rangdajied ka dangïai bat ïa ka kyrdan ba hakhlieh hadien ba ka tam ha ka jingïapher ha ka jingthep kol ïa ka New Challenger.
Ka jingïalehkai ha ka sngi Balang kan long hapdeng ka Lawei SC pyrshah ïa ka Lawsohtun SC ha ka por 12:30 mynsngi bad ka Lumparing SC ïa ka PFR FA ha ka por 2:30 nohphai sngi.
