Shillong, K’Lyngkot 13
Ka jingpynkhamti pura ïa ki nongkitkam ba thymmai jong ka Meghalaya Cricket Association (MCA) ka la long ha ka sngi Ba-ar ha conference hall jong kane ka synjuk ha Polo hadien ba la dep ban jied thymmai ïa ki.
Ïa kane ka ilekshon la pynlong ha u Nohprah jong u snem 2025 bad kane ka kynhun ba thymmai ka kynthup lang ïa u Myntri barim ka sorkar jylla u James P.K Sangma kum u President. Ïa u Sangma, la kyrshan lang da u Vice-President ba thymmai, u Bah Rajiv Bareh, katba u Bah Rayonald Kharkamni u la wanphai biang kum u Secretary. Ïa ka kam Joint Secretary la shimti da u Bah Mebanphira Swer, Treasurer Bah Eddystone Shylla bad u dkhot ka council u Chuba R Marak.
Ki dkhot nongkitkam barim kiba la ïadon lang ha kane ka sngi ki long u President u Nababrata Bhattacharjee.
Shuh shuh ha kane ka sngi, na ka liang ka MCA ka la shim ïa ka kabu ban pynkup burom ïa ki nongïalehkai lem bad ki nongïarap jong ka kynhun.
Te kumta na ka liang u President lem bad kiwei kiwei ki dkhot ki la pynkup burom ïa ka kynhun ki rangïalehkai U-23 lem bad ki nongïarap jong ka kynhun kaba la jop ïa ka plate group jong ka State A Trophy 2025-26 ba la pynïaid da ka BCCI. La pynkup burom ruh ïa ki arngut kiwei pat ki nongïalehkai kata u Akash Kumar Choudhary bad u Purav Agarwal, namar ba ki la ïoh rung ha ka thup ïathied nongïalehkai jong ka Indian Premier League 2026.
