Shillong, K’Lyngkot 13
Ka Ages bad ka United Brothers ki la long kiwei pat kiba la lah ban pynthikna ban jam sha ka quarter final ha ka SCA Third Division Cricket League 2026 ha ka sngi Ba-ar.
Ha ka jingïakhun pre-quarter final kaba la long ha madan Urkaliar, ka Ages ka la pynliem noh ïa ka Super Challengers da 3 wiket. Ka Ages kaba la jop ïa ka kynting pisa, ka la ailad ïa ka Super Challengers ban tied nyngkong ha kaba ka la kamai 160 run bad shah pynkhyllem baroh ki nongtied ha ki 19.2 over. U Kyrmen Skhem u la tied 32 run na ki 17 bol bad u Biplove Bhowmick u la ïoh 28 run na ki 20 bol. Katba u Bartha u la khur 3 wiket bad ïa ki 2 wiket la ïoh da u Chenjing Marak na ka bynta ka Ages.
Haba wan shimti ïa ka pali kaba ar, ka Ages ka la lah ban kynjoh sha ka thong ha ki 17.2 over ha kaba ka la kamai 162 run bad shah pynhap 7 wiket. Kane ka la wan urlong lyngba ka jingïalehkai bha u Drabest Marak uba la lah ban khyrwit ïa ka spah run kaba 121 na ki 63 bol bad u Jamester B Marak, uba la ïoh 12 run na ki 23 bol. Katba u Vishal Kumar u la khur 3 wiket bad ïa ki 2 wiket la khur da u Karan Dhirasarya na ka bynta ka Super Challengers. Ïa ka nam Player of the Match la khur da u Drabest Marak.
Haba phai sha kawei pat ka jingïa-khun kaba ar, ka United Brothers ka la jop da 1 wiket ïa ka Uplifter Alternative. Ka Uplifter Alternative, kaba la shimti ban tied nyngkong ka la kamai 132 run bad shah pynhap 7 wiket ha ki 20 over. U Ramu Thakuri u la tied 36 run na ki 33 bol bad u John Edward u la ïoh 27 run na ki 24 bol. Katba u Piyush bad u Rohit Kr Singh ki la khur mar 2 wiket.
Haba wan shimti ïa ka pali kaba ar ka United Brothers ka la kynjoh sha ka thong da kaba kamai 133 run bad shah pynhap 9 wiket ha ki 18 over. U Rehan Kharbuli u la tied 36 run na ki 31 bol bad u Rupon Talukdar u la ïoh 32 run na ki 26 bol.
