Shillong, K’Lyngkot 13
8 ngut ki nongïalehkai kiba don jingduna ka Jylla hapoh ka lama jong ka Meghalaya State Para-lympics Association, kin pynkhreh ban leit shim bynta ha ka National Para Powerlifting Championship 2025-2026, ka ban long ha Roorkee, Uttara-khand ka ban long naduh 16 haduh 18 tarik mynta u bnai.
Kine ki nongïalehkai ki ban mihkhmat ïa ka Jylla na ki district bapher bapher ki kynthup ïa u Dibistar Shabong, Teng-ran A. Sangma, Kamal Thapa, Luckystar Nong-dkhar, Prisca Pyngrope, Angelina Tynhiang, Phili-sita Myrthong bad ka Mitisdona Shabong.
Ïa katei ka lympung ïalehkai yn pynïaid da ka Paralympic Committee of India ha kaba yn phiah ha la ki jong ki kyrdan kata ka Senior, Junior bad Sub-Junior.
Haba kren ha ka jingïalang ban ai khublei kitbok kitrwiang ïa kine ki nongïalehkai hashwa ba kin mih na ka nongbah, u President MSPA Bah Shaiborlang Lyngdoh Mawphlang u la ïathuh ba ïa ka Meghalaya State Paralympics Association la sdang ha u Ïaïong 2025. U la ïathuh ruh ba ha ka jingleit ïalehkai dangshen bun kiba la wanphai sha la ïing ryngkat ki takma bad kiwei kiwei de ki khusnam.
“Haba ki leit shim bynta ha ki lympung ïalehkai shabar jylla, kine ki nongïalehkai ba watla ki don jingduna ha ki dkhot met, pynban ki la lah ban khur haduh 15 tylli ki takma. Kine ki kynthup mar 5 tylli ki takma ksiar, rupa bad rnong.”
Ha kawei pat ka liang u kongsan u Bah Wailadmiki Shylla, uba dei ruh u Myntri ka tnat ïalehkai ka Sorkar Jylla u la ai mynsiem ïa kitei ki nongïa-lehkai kiba don jingduna ha ki dkhot met ba kin ïalehkai bha bad kyrmen ba kin lah ban wanrah burom ïa ka Jylla hi baroh kawei.
U la ong ruh ba ka Sorkar kan sa shna kawei ka jaka ïalehkai kyrpang tang ïa kiba don jingduna ha ki jingduna dkhot met ba kin ïoh ban pyndonkam.
La ïoh ruh ka jingkren na u Bah H.M Shang-pliang uba dei u nongaibuit ka Sorkar Jylla.
Ha kane ka sngi la ïadon lang ruh u Vice President u Bah Denis Lynrah, Secretary Bah Jones Lamare, ki bahaïing hasem jong ki nongïaleh-kai bad kiwei kiwei.
