Khliehriat, K’Lyngkot 14
Shi bynta ban kyntiew ïa ka kam ïalehkai phutbol hapoh ka district, u MLA ka Khliehriat u Bah Kyrmen Shylla ha ka sngi Balang u la plie ïa ka madan Futsal kaba don ha ka shnong Byndihati, East Jaiñtia Hills District kaba la bei pisa lyngba ka District Mineral Foundation (DMF) Scheme.
Nalor u MLA la donlang ruh u Deputy Commissioner ka East Jaiñtia Hills District, u Shivansh Awasthi, IAS, Sub-Divisional Officer (SDO)- Sadar, u Manish Kumar, IAS, u MDC ka Sutnga-Nongkhlieh u Bah Hambertus Nongtdu bad kiwei kiwei.
Ha ka jingkren kum u kongsan u Bah Kyrmen u la ai ka jingïaroh ïa ka ophis jong u Deputy Commis-sioner kaba la pynsuk ïa ka jingkyntiew ïa ki lad jingïalehkai ha ka district, khamtam eh ban tei ïa ki madan ïalehkai Futsal. U la ai khublei ruh ïa baroh ki nongshim bynta, khamtam ïa ki nongïalam shnong na ka bynta ka jingtreilang bad kyntu ïa ki samla jong ka shnong ban pyndonkam hok ïa katei ka madan na ka bynta ka jingmyntoi jong ki baroh.
U Bah Shylla u la ban jur ruh ïa ka jingdonkam ban sumar bha ïa ka madan ban pynthikna ïa ka jingneh slem jong ka wat haba u la kyntu shuh shuh ïa ki nongïalam shnong jong ka Byndihati ban ïakynduh ïa u khlem kano kano ka jingartatien na ka bynta kino kino ki kam pynroi ha ka shnong bad u la pynpaw ïa ka jingkyrmen ba ka jingdon jong ka madan Futsal kan ai jingmyntoi ruh ïa ki samla ban ïashim bynta shitrhem ha ki kam ïalehkai.
Ha kawei pat ka liang, u Deputy Commissioner ka East Jaiñtia Hills u Shivansh Awasthi (IAS), u la ong ba ka madan ïalehkai Futsal ha Byndihati ka dei ka sien kaba shiphew kum kane ka madan ba la plie hapoh kane ka District, katba lai tylli kiwei pat ki madan ïalehkai Futsal la dep ban tei bad shen yn sa plie paidbah noh ïa ki.
U la pynpaw ba ka jingpynroi ïa kum kine ki jingtei ka ïahap bad ka jingthmu ba kham jylliew jong ka Sorkar Jylla ban kyntiew ïa ki jingïalehkai bad ban kyntiew ïa ka nongbah Shillong kum ka jaka ïalehkai ba kongsan.
U la kdew shuh shuh ba ki jingïalehkai ki ban sa wan kum ka National Games bad ka jingtei ïa ki madan ïalehkai phutbol kiba heh kan ailad kham bun ïa ki nongïalehkai kiba dang khie dang san.
Shuh shuh, u Awasthi u la pynpaw ïa ka jingpyndonkam hok ïa ka pisa jong ka DMF ha kylleng ki bynta bapher bapher ha ka distrik ha kine ki snem ba la dep ha kaba la pynbha bad pynthymmai kumba 50 tylli ki skul ban pynbha ia ki lad pule puthi, la pynlong ruh ïa ki Winter Camp ban pynsngewthuh shaphang ka jingdih drok naduh ki khynnah klas VIII haduh XII khamtam ha ka liang ka koit ka khiah, la pynthymmai ïa ki katto katne ki jaka ai jingsumar ba kynthup ïa ki Primary Health Centre (PHC) katba ïa ki tiar ba kham bun la pynbiang ïa ka Civil Hospital, Khliehriat lyngba ka DMF.
