Shillong, K’Lyngkot 14
Ka Umkseh SC ka la jam sha ka kyrdan ba-ar ha ka lympung ïalehkai First Division Football Tournament ba la pynïaid da ka Tyrsad Area Sports Association (TASA), hadien ba ka la pynliem noh ïa ka Kyrphei SC da 3-1 kol ha ka sngi Balang.
Ha kane ka jingïakhun kaba la long ha madan Mawlum kaba ha Tyrsad, ka la long kaba itynnad bad kaba ïakhaid bha, hynrei dei ha ka minit kaba 20 ba ka Umkseh ka la ïoh ban pynkhih jar nyngkong lyngba u Dibasstar Rani na ka bynta ban tam shi kol ha ka kylla step.
Hynrei hadien ba la bteng ïa ka jingïakhun jong ka kylla miet, ka Umkseh ka la pynbud biang ïa ka kol kaba ar lyngba u Rangkynsai Rynjah ha ka minit kaba 53 bad ïa ka kol kaba lai la thep da u Pyntngenlang Rani (70). Hashwa ban wai ka Kyrphei ka la lah ban pynphai kylla shi kol lyngba u Bankitlang kharsyntiew (90+2) hashwa ba kan mad ïa ka jingshah rem.
Lyngba kane ka nam jop ka Umkseh ka la jam na ka kyrdan basaw sha kaba ar, ha kaba ka la kamai 9 poiñ bad ka la duna sa tang shi poiñ ïa ka Mawkynroh SC, kaba danglamkhmat ha ka Group-B, katba ka Kyrphei ka dangsah ha ka kyrdan ba shatrai khlem da lah ban khur jingjop ha baroh saw sien ïakhun.
Haba phai sha kawei pat ka jingïakhun jong ka Group-A hapdeng ka Perkseh SC bad ka Nongspung AYSCSA ki la ïasam mar shi poiñ hadien ba kim shym la lah ban thep kol haduh ba kut ka jingïalehkai.
Lyngba kane ka jingïakhaid kine ki kynhun ki la kamai mar 5 point ha kaba ka Perkseh ka la don ha ka kyrdan basaw bad ka Nongspung ha ka kyrdan basan.
Kane ka lympung kan bteng biang ha ka 22 tarik mynta u bnai ha kaba ka Mawlum Tyrsad SC kan ïakhun pyrshah ïa ka Mawdngong sc ha ka por 11:30 mynstep, katba ka Umkaber Sc ïa ka Mawkynroh SC ha ka por 2 baje nohphai sngi.
