Shillong, K’Lyngkot 14
Ka lympung ïalehkai Second Division Cricket League 2026 ba la pynïaid da ka Shillong Cricket Association ka la nangjam shaphrang ha kaba ka Jersey King bad ka Cluster CC ki la khur jingjop ha ka sngi Balang.
Ha kane ka jingïakhun kaba la long ha madan Urkaliar, ka Jersey King ka la pynliem noh ïa ka Golf link XI Star da 32 run. Ka Jersey King ka la shimti ban tied nyngkong ha kaba ka la kamai 163 run bad shah pynhap 5 wiket ha ki 20 over. U Raj Biswas u la khyrwit ïa ka shiteng spah kaba 65 run na ki 45 bol bad u Sunil Gurung u la ïoh 44 run na ki 33 bol. Katba u Pritam Singh bad u Ankit Ojha ki la khur mar 1 wiket.
Haba wan beh ïa ka thong, ki nongtied ka Golf link XI Star ki la shah pynkhyllem lut baroh bad kamai tang 132 run ha ki 17.2 over. U Mk Gosh u la tied 32 run na ki 47 bol bad u Md.Feroz u la ïoh 24 run na ki 9 bol.Katba u Avinash kr. Rai bad u Rajat Rizal ki la khur mar 4 wiket. Ïa ka nam Player of the Match la khur da u Avinash Kumar Rai, uba la tied 6 run bad shim 4 wiket.
Haba phai sha kawei pat ka jingïakhun kaba ar, ka Cluster CC ka la jop da 6 wiket ïa ka Nongpdeng CC. Ka Nongpdeng ka la kam trai ban tied nyngkong, ha kaba ka la kamai tang 68 run bad shah pynhap wiket baroh ki nongtied ha ki 16.3 over. Kane ka la wan urlong lyngba ka jingïalehkai bha u Gyandeep Kachari uba la khur 3 wiket lem bad u Quereshi, uba la ïoh 2 wiket. Katba u Sani Dkar u la tied 2 run na ki 30 bol.
Haba wan shimti ïa ka pali kaba ar, ka Cluster ka la lah da kaba suk ban kynjoh sha ka thong da kaba kamai 69 run bad shah pynhap 4 wiket ha ki 8.3 over. U Basant Cheerti u la tied 37 run na ki 10 bvol bad u Prosenjit Paul u la ïoh 12 run na ki 15 bol. Katba u Nerykupar Dkar u la khur 2 wiket. Ïa ka nam Player of the Match la khur da u Basant Cheerti, uba la tied 37 run bad shim 1 wiket.
