Shillong, K’Lyngkot 14
U rangïalehkai ka NorthEast United FC, u Redeem Tlang u la pynpaw ïa ka mynsiem kaba kmen hadien ba dangshen ka All India Football Federation (AFF) ka la pynbna ba kan pynlong ïa ka lympung ïalehkai Indian Super League (ISL) naduh 14 tarik u Rymphang mynta u snem.
Une u rangïalehkai ka Jylla u la pynpaw ba kum u nongïalehkai u dap da ka jingsngewkmen hadien ba baroh shi katta ki sngi ki por bad ki bnai la shu ap khmih lynti ba lano kane ka lympung kan long biang.
U Redeem u pynpaw ba kane ka khubor ka pynkmen bha ïa baroh ki rangïalehkai phutbol namar ha kine ki sngi ki por kiba la dep, kim tip shuh kaei ka ban jia, hynrei da kane ka jingpynbna ba kane ka phutbol kan sa long biang, ka long ka khubor kaba kmen tam ïa ki.
Nalor kata u Redeem u ïathuh ba na ka liang ka klob ka la pyntip ba shen kan sa sdang ban lum ban lang ïa baroh ki rangïalehkai na ka bynta ban sdang ïa ka jingkilan met bad ban pynkhreh na ka bynta ka samoi ban ïakhun ïa kane ka lympung.
