Shillong, K’Lyngkot 14
Ka Lumparing SC bad ka Pay For Right Football Academy (PFR FA) ki la ïasam mar shi point ha ka lympung ïalehkai Women’s Football league 2026 ba la pynïaid da ka Shillong Sports Association, hadien ba ki la ïakhaid mar 1-1 kol ha ka sngi Balang ha SSA Stadium kaba ha First Ground Polo.
Da kane ka jingïakhaid ka la pynlong ïa ka Lumparing ban danglamkhmat ha ka Group-B watla ka la ïaryngkat mar 10 poiñ bad ka PFR, kaba don ha ka kyrdan ba-ar.
Haba phai sha ka jingïalehkai, ka Lumparing ka la pynkhih jar nyngkong ha ka kylla step lyngba ka Ïaphishisha Marbaniang ha ka minit kaba 32, hynrei ha ka kylla miet ka PFR ka la pynphai kylla lyngba ka Phibandamary Nongrum (70+2).
Haba phai sha kawei pat ka jingïalehkai jong kane ka group, ka Lawei ka la pynliem noh ïa ka Lawsohtun da 4-1 kol. Ka Lavinia Lyngkhoi ka la thep marwei ar kol ha ka minit kaba 11 & 22, katba ïa kiwei pat la thep da la Delfinia Syiem (32) bad ka Darisha Ladong (65). Na ka liang ka Lawsohtun ka la pynphai kylla lyngba ka Ibasuklin Syiemlieh (34).
Lyngba kane ka jingjop ka Lawei ka dangbat ïa ka kyrdan balai bad kamai 6 poiñ bad ka don jingkyrmen ban ïoh rung sha ka quarter final kum ka kynhun kaba kynsai (best third).
