Shillong, K’Lyngkot 14
Ban kyntiew ïa ka kam ïalehkai kickboxing, ka All Meghalaya Kickboxing Association (AMKA) ha ka jingïatreilang bad ka North East Kickboxing Association, kan pynlong ïa ka 4th North East Kickboxing Championship 2026 naduh 29 tarik haduh 31 tarik mynta u bnai ha kane ka nongbah.
Haba kren sha ki lad pathai khubor ha Shillong Press Club, u Working President u Bah Samuel Hashah u la ïathuh ba ka kynhun ka la sdang biang ban pynlong ïa kane hadien kumba lai ne saw snem ba ki la sangeh ban pynlong.
Shuh shuh u la ïathuh ba ha kane ka jingïakop ki jylla na ka thaiñ shatei lammihngi kin wan ban ïashim bynta kum na Assam, Nagaland, Manipur, Sikkim, Megha -laya, Mizoram, bad kiwei.
U la ïathuh ruh ba ha kane ka jingïakop kin don ha bun ki kyrdan ïakop kum ka Junior, Sub Junior, Senior jong ki shynrang bad kynthei.
U Bah Samuel u la ïathuh ba ka kynhun ka la pynkreh da ki takma bad ki syrnod sha ki nongjop bad kumjuh ka song pisa na ka bynta kito kiba ïalehkai bha bad jop bun tylli ki takma.
