Nongstoiñ, K’Lyngkot 15
Ka jingbym pat lah jong ka Nongstoiñ District Sports Association ( NDSA) ban pynlong ïa ki lympung ïalehkai jong snem 2025, ka la pynlong ïa ka Khasi Students Union (KSU) West Khasi Hills ba kan mih shakhmat ban tuklar halor kane ka bynta.
Katkum ka kyrwoh na ka KSU West Khasi Hills lyngba ka Sports Commit-tee, ka la pynpaw ba ka seng ka sngewkhia jur halor kane ka bynta, hadien ka jingïoh jingujor na ki nongïalehkai phutbol bad ruh na ki kynhun ïalehkai kiba hap hapoh ka NDSA halor ka jingbym lah jong ka ban pynlong ïa ki lympung ïalehkai jong u snem 2025.
Shuh shuh ki nongïalam ka KSU ki la ong ba kum ka seng ka kwah ba na ka liang jong ka NDSA kan shim khia ïa kane ka bynta namar kumba la sngewthuh kiba bun ki nongïalehkai kiba don ïa ki sap ki phong ki la duh jingmyntoi na ka daw jong ka jingbym lah ban pynlong ïa kane ka lympung.
Ka KSU ka la pynpaw ruh ba kum ba long mynta bad ka dei ruh ka jingkylli na kiba bun kiba don hapoh ka NDSA ba ka lahduh jong ka Super Division manla u snem kan hap ban leit ïashim bynta ha ka Meghalaya State League, hynrei kumba long mynta ym lah ban pynlong ïa kane ka lympung, hato kaei ka lad ka lynti ba ka NDSA kan hap ban shim halor kane ka bynta.
“Ka seng ka ïohi ruh ba ka rukom pynïaid ka NDSA ïa ki kam ki jam ka i dkoh bad kam lah ban ïaid beit ïaid ryntih kumba long ha ki snem ba la lah,” la bynrap ka KSU.
Halor kane ka bynta ka KSU lyngba ki nongïalam jong ka, ki la kyntu ba kino kino ki synjuk ïalehkai kiba hap hapoh ka West Khasi Hills District haba ki don ki kam ba la bynshet ki dei ban shim khia namar ka seng ka kwah ba ki khun samla kin ym lehnohei ki sap jong ki bad ba kin ïoh ïa u soh ka jingtrei shitom.
Ha kajuh ka por ka seng ka kyntu ïa ka NDSA ba kan shim khia noh ban pynbeit ïa kine ki kynrum kynram bad ka la kyntu ruh ba ka NDSA kan pynkloi noh ban pynlong ïa ki lympung ïalehkai na ka bynta u snem 2025.
