Khliehriat, K’Lyngkot 15
Ka East Jaiñtia Hills District ka la plie biang sa kawei madan ïalehkai Futsal ha ka shnong Latyrke lyngba ka District Mineral Foundation (DMF) Scheme na ka bynta u snem 2025-2026.
Ïa kane ka madan la plie paidbah da ka MLA ka Sutnga Saipung, ka Kong Santa Mary Shylla ha ka sngi Palei ha ka jingdon lang u Deputy Commissioner ka East Jaiñtia, u Shivansh Awasthi (IAS), kumjuh u Block Development Officer (BDO) ka Saipung C&RD Block, u Dr R. Pyrtuh, ki waheh shnong nalor ki paidbah ka thaiñ.
Ka Kong Santa Mary ha ka jingkren ka la pynkynmaw ba ka jingdawa ïa ka madan ïalehkai Futsal ha shnong Latyrke ka la sahkut naduh u snem 2024 bad ka la pynpaw ïa ka jingkmen ba ïa kane ka projek kaba la ap slem bha ka la urlong.
Ka la pyntip ba kane ka madan ïalehkai ka heh kumba 12 hajar square feet ka long kum kawei na ki madan futsal kaba heh tam ha kane ka District, haba ïanujor bad ka jingheh kaba 10,000 square feet sha kiwei pat ki jaka, bad la shna pynheh khnang ban suk ki nongïalehkai ban ïashim bynta.
Ka Kong Shylla ka la ban jur ruh ïa ka jingdonkam ki madan futsal na ka bynta ka koit ka khiah bad ka bha ka miat jong ka imlang sahlang, da kaba pynpaw ba kum kine ki jaka ki pynshlur ïa ki briew ha baroh ki rta, kynthup ïa ki rangbah, ban long kiba khih ba ksar, khamtam ha ki por janmiet.
Te kumta ka wer ïa baroh ki nongshim bynta ban ïatreilang na ka bynta ka jingmyntoi jong ki samla, da kaba bynrap ba ka jingïalehkai ka don ka bynta kaba kongsan ha ka ban weng ïa ki jingeh ha ka koit ka khiah bad ban thaw lad na ka bynta ki samla ha ka por ba ki lad kamai ki nangduna.
Na ka liang u Shivansh Awasthi u la ai khublei ïa ka shnong Latyrke halor ka jingplie ïa ka madan ïalehkai futsal kaba khadwei jong ka district bad u la ai khublei ïa ka jingïalam bad ka jingïohi jngai jong ka MLA ha kaba pynlong ïa kane ka projek kaba jop.
