Ka jingïoh kurup jong ki pulit Anti Narcotics Task Force (ANTF) ïa ki tyndong thep drok da ki synduk ha ki bynta jong ka Lum Survey ka pynpaw ba imat na kane ka jaka la pynïaid shakhmat ïa ka kam pynphriang bad khaïi drok. Katkum ka jingïoh ban sakhi ha kane ka jinghiar khynra jong ki ANTF, la sakhi ba kane ka jaka ka long shisha kaba isaitmet haduh katta-katta ban peit bad ym lah shuh ban mutdur kumno ki briew ba shong ba sah ha kine ki ïing ki im. Ka jingdon ki bar jylla kiba sah ha ka jaka ka la pyni pyrthei sa ïa kawei pat ka jaka kaba ym don ba tip kumno ki briew ki ïoh rung ïoh mih bad shong bad sah katba ki mon hapdeng ka jingjyllei jong ka jaboh jabaiñ bad jingkhapngiah.
Ka jinglong jingman jong kane ka jaka ka long shisha kaba isaitmet bad ruh kaba pynjah noh ïa ka burom ka ijot jong ka nongbah Shillong. Kum ki briew ngim lah satia ban ngeit ba kum kane ka jaka ruh kan don hapdeng ka nongbah Shillong, ba wat hapdeng ka jingjaboh kaba ishyrkhei, hynrei ka long pat kaba khapngiah na ka jingsah jong ki briew ha ki ïing kiba la shu tap da ki tin bad plastic. Ngi dang kynmaw ruh ba ha kine ki snem kiba la leit, na ka liang ka HYC ka la dep ban pynlong ka jingkhynra ha kine ki bynta bad na ka liang ka HYC ha kito ki por ka la leit ïakynduh ïa ki bor jong ka Shillong Cantonment Board (SCB), kaba dei jong ka tnat Ïada Ri (Defence) jong ka Sorkar Pdeng, hynrei la sngewthuh ba ka shlem treikam kaba peit ïa katei ka jaka shadien jong ka Them Metor ka dei ka Defence Estate Office (DEO) kaba don shaduh Guwahati. Ka Sorkar Meghalaya ka dei ban ïakren bad ka tnat Ïada Ri bad kumjuh ruh ka DEO ban kylli ha kano ka dur la ai jaka sah ïa kitei ki briew ha katei ka jaka. Watla kam dei satia ka khyndew jong ka Sorkar Jylla, hynrei dei ban buh jingkylli namar ngi hap ban peit na ka liang ka jingïoh mon jong ki briew ban wan rung sha katei ka jaka bad pynlong jaka sah khlem da don ka jingpeitngor kaba thikna.
Kumta donkam ïa ka Sorkar Jylla ba kan tuklar namar ha ka jinghiar khynra ki ANTF, la ïohi ba ki la ïoh ban kurup shibun ki tyndong thep drok bad kaba pynpaw ba imat ka dei ka jaka pdeng jong ka jingïadie drok bad ban leh ïa kiba bun ki kam sniew. Shisien ba la dei ka ktem ki nongdie drok, ngi la sngewthuh lypa ïa ki kam sniew kiba mih bad kiba lah ban mih na katei ka jaka bad saphriang sha kiwei pat. Ki kam sniew kam smeh kum ka tuh ka thiem, lute, jingpynïap briew bad kumta ter-ter ki lah ban kharoi lada ym shimkhia noh mynta.
Ka Shillong kam dei ka jaka theh ñiut ha kaba mano-mano ki lah ban shu wan shong wan sah katba ki mon bad pynjaboh. Kumta ka long kaba donkam ba dei ban shimkhia biang ban wad jingtip kaba bniah la ki briew kiba sah ha kine ki jaka ki dei ne em kiba la biang ki kot ki sla. Kawei pat ka bynta ka long ka jingdonkam ban ïaleh ban pynkhuid syndon ïa ki kam khaïi drok kiba lah ban mih na kane ka jaka hadien ka jinglap ïa shibun tylli ki tyndong thep drok bad kumta ka long kaba donkam ïa ka tnat pulit, bor pynïaid district ban leh eiei halor kane ka bynta. Halor ka jingdon jong ki briew kiba shong ba sah ha katei ka jaka, ka Sorkar Jylla ka dei ban shim nuksa na ka Them Ïew Mawlong kaba la heh suki pa suki haduh ba ka la buh jingeh ban weng ïa kito kiba la shong la sah be-aiñ. Balei ngin ap haduh ban da heh da san katei ka jaka ba shong da ki briew ki bym I thikna? Ha kaba khatduh, lada ailad kumne, ka ban ïakynduh jingeh kan dei ka Sorkar Jylla.
