Washington, K’lyngkot:
Ka United States, ka la sdang ban weng noh ïa ki katto katne ngut ki briew, na ki ktem shipai jongka kiba don ha Middle East, la ong u heh jong ka US, ha ka Sngi Balang, hadien ba uwei u heh ophisar jong ka Iran, ula ong ba ka Tehran, ka la maham ïa ki para marjan, ba kan hiar thma ïa ki ktem jong ka America, lada ka Washington, ka hiar thma.
Da ka jingpyrshang jong ki nongïalam ka Iran ban pynjem ïa ka jingkulmar kaba shyrkhei tam hapoh ka ri kaba ka Islamic Republic ka la ïakynduh, ka Tehran ka pyrshang ban khanglad ïa ka jingbyrngem ba man ka por jong u President jong ka US Donald Trump ban tuklar na ka bynta ki nongïakhih pyrshah sorkar.
Namar la ong ba ki dkhot jong ka UN Security Council ki la dei ban iakynduh lang ha Iran ha ka Sngi Palei katkum ka jingpynbeit jong ka United States.
Uwei u heh sorkar jong ka US, uba kren khlem da kwah ban pynpaw kyrteng, u la ong ba ka America, ka tan noh ïa ki katto katne ki briew na ki jaka sah ba kongsan ha katei ka thaiñ, kum ka jingïada, namar ka jingjur jong ki jingeh ha katei ka thaiñ.
“Baroh ki dak ki shin ki pyni ba ka jinghiar thma jong ka US ka la jan, hynrei kata ruh ka long kumno kane ka sorkar ka leh ban pynsah ïa baroh ha ki tyrpeng jong ki. Ka jingbym lah ban tip lypa ka dei ka bynta jong ka buit,” ong u heh shipai jong ka ri Sepngi ha ka Reuters hadien ha ka Sngi Balang.
Hynrei ha White House, u Trump, u la ai jingmut ba u shim ia ka rukom ap bad peit ia ka jingeh.
U Trump, u iathuh ha ki nongthoh khubor, ba la iathuh ia u, ba ki jingpyniap briew ha ka jingpynshitom jong ka sorkar Iran, ia ki jingiakhih, ki la nang duna bad ba u ngeit, ba mynta, kam pat don satia ka jingthmu ban pyniap ia ki briew kiba heh.
La kylli mano ba la iathuh ia u ba ki jingpyniap briew ki la sangeh, u Trump u la batai ia ki kum ki “tyllong kiba kongsan bha na kawei pat ka liang.”
U president um shym la kyntait ïa ka jingleh shipai jong ka US kaba lah ban jia, da kaba ong “ngin sa peit bniah kaei ka rukom treikam” shwa ban kdew ba ka sorkar jong u ka la ïoh ïa ka “jingkren kaba bha bha” na ka Iran.
U myntri kam bar ri jong ka Iran, u Abbas Araqchi, u la ong ha ka Sngi Balang ba “kam don kano kano ka jingthmu” jong ka Iran ban pyniap briew, haba la kylli halor ki jingiakhih pyrshah sorkar.
“Ym shym la thmu sdien phasi da lei-lei ruh”, la ong u Myntri kam bar ri ha khmat ki lad pathai khubor ha ka jingiakren ha ka prokram ba kyrpang jong ka ‘Fox News’ ka prokram “Special Report with Bret Baier”, ha kaba u la ong ba kim dei ban iakren ne buh jingkylli shaphang ka jingphasi ia kito ki paidbah nongiakhih, namar ka Iran ka khlem don jingmut ne thmu ban leh eiei kaba kum kata.
Katkum ka jingong jong ka Iran Human Rights Society kaba don ha Norway, ka jingshah sien phasi kam don jingsngew pher shuh ha ki patok jong ka Iran.
