Shillong, K’Lyngkot 15
Ka kynhun ki nongking lieng ka Jylla ka la wan ba-ar ha ka 12th National Canoe Slalom Championship 2026 kaba la long ha Maheshwar kaba ha Madhya Pradesh, hadien ba ka la khur ar tylli ki takma ksiar bad 7 tylli ki takma rupa.
U Manbhalang Kharkrang, ka Elizabeth Vincent bad u Vikash Rana ki la ïoh rung sha ka Asian Games, hadien ba ki la lah ban pynpaw ïa ka jingtbit ha katei ka jingïakop kaba la poi sha kaba kut ha ka sngi Palei.
Ïa ki ar tylli ki takma ksiar la khur da u Manbhalang Kharkrang ha ka Kayak Men Junior bad ha ka Kayak Cross Junior Men. Kumjuh ka Elizabeth Vincent ka la khur ar tylli ki takma rupa ha ka Kayak Women Senior bad ka Kayak Cross Senior Women. Kumjuh u Vikash Rana u la khur ïa ar tylli ki takma rupa ha ka Kayak Men Senior bad ka Kayak Cross Senior Men. Ïa kiwei pat ki takma rupa la khur da ka Purnima Rana ha ka Kayak Women Junior, u Indra Sharma ha ka Canoe Men Junior bad ka Riyanka Nongsiej ha ka Canoe Women Junior.
Ïa kane ka kynhun la ïalam da ki shi kurim kata u Ian Vincent bad ka Sheela Vincent.
Lah ban kdew ba u Vikash Rana u dei uba la khur takma ksiar ha ka Kayak Cross Extreme Slalom jong ka 38th National Games jong u snem 2025 ha Uttarakhand, katba ka Elizabeth Vincent (Women’s Kayak Cross Extreme Slalom) bad u Indra Sharma (Men’s Slalom C1 Event) ki la khur ïa ki takma rupa.
