Tehran, K’lyngkot:
Ka Iran, ka la pynmih ia ka jingbyrngem kaba shyrkhei, pyrshah ia u President jong ka America, U Donald Trump, ha ka Sngi Balang. Ka jingmaham kaba la pynbna ha ka TV jong ka sorkar Iran, kaba la pyni ïa ki video jong ka jingpyrshang pynïap jong u Trump ha u snem 2024 ha Pennsylvania bad ha kane ka kynti, ka Iran ka la ong, “Ha kane ka sien, u kuli un nym lait shuh na ka thong.”
Ha ka 13 tarik u Naitung, 2024, uwei u briew uba kieng suloi u la siat ïa u Trump ha ka jingïalang ïalap elekshon ha Butler, Pennsylvania, da kaba bsa ïa ka shkor jong u. Hadien katei ka jingshah thombor, utei u nongialam jong ka seng Republican, u la hiar na madan da kaba snam bad pump ia la ka kti.
Katei ka jingbyrngem, ka wan ha ka por jong ki jingiakhih ha Iran, bad U Trump, ula byrngem ban tuklar da ki shipai, bunsien, naduh ba katei ka jingiakhih, kaba la pynkhihwin ia katei ka ri, ka la sdang ha kaba kut jong u bnai Nohprah. Kitei ki jingiakhih ki dei kiba heh tam naduh ba la pynbna ia ka Islamic Republic ha u snem 1979.
U Trump u la kren bunsien ha kine ki sngi ba ladep ban wan iarap ia ki paidbah Iran halor ka jingpynshitom bein ia ki jingiakhih kiba ki kynhun iada hok ki ong ba ka la pyniap ym duna ia ka 3,428 ngut ki briew. Ka US ka la byrngem ruh ban leh da ki bor shipai lada ki bor synshar ki pyntreikam ïa ka jingpynshitom ïap ïa ki briew kiba la shah kem ha ka por ba ki ïakhih.
Ha ka Sngi Balang, U Trump u la ong ba la iathuh ia u da “ki tyllong khubor kiba kongsan bha na kawei pat ka liang” ba ki jingpyniap briew da ka jingpynshitom bein jong ka sorkar Iran ia ki jingiakhih ki nang jem bad ba ym shym la don kano kano ka jingthmu ban pyniap briew.
