New Delhi, K’lyngkot:
Namar ki kynrum- kynram kiba jia ha Iran ha kine ki sngi, ka tnat kam bar ri jong ka India ka la pynbna ba ka India ka dang pyrkhat halor ki jingpynbeit bad jingthmu ban wanrah biang noh ia ki nong India baroh na Iran katba ka US bad Iran ki dang don hapdeng ka jingbym ia sngewthuh jingmut.
Hynrei ia kane ka kam ba la pynbna da katei ka tnat kam bar ri, ym pat shym la pyntreikam satia tad haduh ban da ioh ia ka rai bad ka jingbthah ba thymmai. Hynrei la ong ba ka jing pynkynriah lypa noh kham kloi, ka lah ban pyllait na kino- kino ki jingeh ne jingshah ktah jur hadien- habud. Namarkata la ong ba ka India ka la thmu ban pynkynriah noh ia ki paidbah nongshong shnong jongka baroh kiba don ha Iran.
U la bynrap ruh ba ki heh jong ka Embassy ki don ha ka jingïadei beit bad ki samla pule bad lada donkam ban pynkynriah, kin leit jngoh ïa ki samla pule bad pyntip ïa ki lyngba ki lad ba thikna.
Ha ka Sngi Balang, u Myntri kam bar ri, u S.Jaishankar u la ioh iakren phone bad u Myntri kam bar ri ka Iran u Seyed Abbas Araghchi, ha kaba ki la iakren halor ka jinglong jingman hapoh bad sawdong jong ka Iran.
Kumta, la ong ba ka tnat kam bar ri (MEA) ka la ai jingmut ia ki nong India ba kin kiar na kaba leit sha Iran. Katkum ka jingkheiñ jong ka tnat kam bar ri, ki don kumba 10,000 ngut ki nong India ha Iran.
Ka India, ka la ai jingmut halor ka jingleit jingwan jong ka, hapdeng ka jingjur jong ki jingïakynad ha ka thaiñ, kaba la mih na ka jingmaham jong u President jong ka America, U Donald Trump, ba kan phah thombor da ki shipai, lada ka Iran, ka bteng ïa ka jingpynshitom beiñ ïa ki nongiakhih ha baroh kawei ka ri. Kitei ki jingiakhih, ki la jia ha Tehran, ha kaba kut jong u bnai ba ladep, hadien ka jinghiar dor jong ka pisa Iran, kaba la jia nyngkong eh ha ka histori jong katei ka ri bad katei ka jingiakhih ka la pur sha baroh 31 tylli ki bynta jong katei ka ri.
U Trump, u la byrngem ban leh da kaba tyngeh bha, kynthup naduh ka jingleit thombor da ki liengsuiñ ba khlaiñ bor jong ka US, lada jia ba ki bor synshar jong ka Iran, ki ïaid shakhmat ia ka jingthmu ban phasi ïa kito kiba iadon bynta ha katei ka jingiakhih paidbah ha katei ka ri. Kum ka jingkynthoh, ki nongialam jong ka Iran, ki la pynbna ba katei ka ri, ka la long kaba “khreh na ka bynta ka thma” bad ki la kular ban hiar thma ia ki ktem shipai jong ka US, ha baroh kawei ka thaiñ, lada ka US ka nud shisha ban pyni bor ia ki.
