Shillong, K’Lyngkot 18
Ka kynhun ïalehkai ka Jylla hapoh ka lama jong ka All Meghalaya Traditional Wrestling & Pankration Association (AMTWPA) ka la thaw ïa ka khana da kaba khur ïa ka nam lahduh ha ka Pankration ha ka lympung ïalehkai 13th All India Traditional Wrestling and Pankration Championship kaba la long ha Peddem, Goa ha ka 8 bad 9 tarik mynta u bnai.
Ha kane ka 1st Amateur Mixed Martial Arts National Championship, ka kynhun ïalehkai ka Jylla ïoh ban khur haduh 9 tylli ki takma ksiar, kumjuh 7 tylli ki takma rupa bad 9 tylli ki takma rnong. Te kumta kane ka long ka burom bakhraw ïa ka Jylla ha katei ka lympung ba la pynïaid da ka All India Traditional Wrestling & Pankration Federation
Ka kynhun kaba la wan ba-ar ka dei ka Karnataka AMMA Association bad ïa ka kyrdan balai la ïoh da ka Rajasthan AMMA Association.
Halor katei ka jingjop, na ka liang u Bah Ryngkatlang Nongrum, General Secretary ka AMTW&PA u la pynpaw ba ka long ka jingsngewsarong ïa ka Jylla hi baroh kawei ba kane ka synjuk bad ki dkhot jong ka ki la ïoh ban khur pat sa ïa ka nam ba-ar sa ha ki Traditional Sports kum ka Mas-Wrestling, Belt Wrestling & Naga Wrestling kaba la long ka sien ba nyngkong eh ban pynlong naduh ka 10 haduh 12 tarik mynta u bnai hapoh ka ri.
Ki la don kumba 1,500 ngut ki nongïalehkai na kylleng ka ri India kiba la wan ban ïashim bynta ha katei ka lympung kaba la long ha Goa.
Ka Maharashtra Traditional & Wrestling Team ka la ïoh ban rah ïa ka nam lahduh ha katei ka lympung bad ïa ka kyrdan ba-ar la ïoh da ka Meghalaya bad balai ka Haryana.
