Shillong, K’Lyngkot 19
U President ba thymmai ka Meghalaya Cricket Association (MCA) u James P.K. Sangma u la pynpaw ka jingangnud ban don ïa ka stadium kaba paka hapoh ka Jylla bad ruh ban pynbiang ïa ki jaka ïalehkai kiba paka
Ïa kane u la pynpaw ha ka jingïalang pynkup burom da ka Shillong Cricket Association (SCA) kaba la long ha ka lah sngi U Blei hadien ba u la shah jied kum u nongïalam ba thymmai ka MCA.
Ha kane ka jingpynkup burom la wan ban ïa don bynta da ki dkhot jong ka SCA ba kynthup ïa u President u Bah Peter McDonald K. Sawian, ha ryngkat ki nongkitkam jong ka.
Haba kren ha kane ka sngi , u James u la pynpaw ïa ka jingsngewnguh kaba khraw ïa ka SCA na ka bynta ka jingpynkup burom bad na ka bynta ka jingshaniah kaba ki la bynshet ha u ban ïalam ïa ka MCA.
U la pynpaw ruh ïa ka jingangnud jong u ban pynkhlaiñ ïa ka kriket ha Jylla bad pynthikna ba un aiti lut ha ki kam ba la pynkhamti ha u.
Shuh shuh u la ong ba ka synjuk kan ai jinghikai ïa ki khynnah bad ban kyntiew ïa ka kriket ha ka Jylla ym tang ha sor ne khap sor, hynrei wat shaduh ki shnong kiba kyndong ruh kumjuh.
