Shillong, K’Lyngkot 19
Ka Metallica CC bad ka Sanmer ki la khur jingjop ha ka Second Division Cricket League 2026 ba la pynïaid da ka Shillong Cricket Association ha ka lah sngi U Blei.
Ha kane ka jingïakhun kaba la long ha madan Urkaliar, ka Metallica ka la pynliem noh ïa ka Jersey Kings da 97 run. Ka Metallica kaba la kam trai ban tied nyngkong, ka la kamai 256 run bad shah pynhap 8 wiket ha ki 20 over. U Binay Ray u la tied 58 run na ki 28 bol bad u Bishal Chettri u la ïoh 54 run na ki 33 bol. Katba u Vivek Sunar bad u Sunil Gurung ki la khur mar 3 wiket.
Haba wan beh ïa ka thong, ka Jersey King ka la kamai tang 159 run bad shah pynhap 6 wiket ha ki 20 over. U Raj Biswas u la khyrwit ïa ka spah run kaba 103 na ki 62 bol bad u Franklin Wann u la ïoh 14 run na ki 26 bol. Katba u Bishal Chettri u la khur 3 wiket bad ïa ki 2 wiket la ïoh da u Yogendra Singh. Ïa ka nam Player of the Match la ïoh da u Bishal Chettri.
Haba phai sha kawei pat ka jingïakhun kaba ar, ka Sanmer ka la jop da 7 wiket ïa ka Masonic. Ka Masonic ka la shimti ban tied nyngkong ha kaba ka la kamai 140 run bad shah pynhap 9 wiket ha ki 20 over. U Sanjay Biswas u la tied 26 run na ki 22 bol bad u Amarnath Sharma u la ïoh 24 run na ki 18 bol. Katba u John D bad u Pynshngaiñ Dkhar ki la khur mar 2 wiket.
Haba wan shimti ïa ka pali kaba ar ka Sanmer ka la lah ban kynjoh sha ka thong da kaba kamai 143 run bad shah pynhap 3 wiket ha ki 12.1 over. U Marken B u la tied 62 run na ki 30 bol bad u Damanbha Roini u la ïoh 20 run na ki 13 bol. Katba u Bunny Sharma u la khur 2 wiket bad ïa ka 1 wiket la ïoh da u Bekash Gurung. Ïa ka nam Player of the Match la ïoh da u Marken B Kharkongor.
