Katkum katei ka phang ne subject haneng nga kwah ban pyni ban ïa tip baroh ki khun u Hynñiewtrep, shaphang ka jingiohi jong nga halor ka jingai jaid sha ka kmie. Kane ka jingai jaid sha ka kmie kam dei kaba la buh na u Blei nongthaw nongpynlong ïa ngi ki briew. Kane ka jingai jaid sha ka kmie ka pynsniew bad ka wanrah ïa ka sang ka ma na ka shongkha shongman, lada ngi khlem kylli bniah ïa ka longïing longsem u briew ne ka briew kaba ngi ieit bad iapmat. Namar u shynrang briew don kiba ioh lok bun ngut ne kiba shu pynioh khun ïa ki kynthei. Shu buh uwei u briew u ioh lok saw lane san ngut ki tnga na ki jaid bapher bapher. Ki khun jong kine ki kynthei ba u shongkha ki ïadei shipara trai namar ki ioh ia u symbai bad ka longrynïeng na ujuh u kpa, wat la ki ïapher ki jaid jong ki kmie ne ki tnga. Kine ki lok ki ioh khun mar 4 ne 5 ngut na une u kpa. Te haba ki la heh la san bad la khlad noh u kpa bad wat ka kmie ruh. Kumta ki khun kiba la ai jaid bapher bapher jong ka kmie baroh katkum ka dustur. Te ynda ki la heh la san halor ki la sah jngai ha la ki shnong bapher bapher.
Namar ha ka shongkha shongman ki lah ban ïa poi kha badno badno ha kylleng ki shnong bad ki District, ruh. Kumta kine ki khun jong une u briew namar ba ïapher ka jaid ka kynja ki don ki ban ïa itynnad samla lane wat ban ïa poi kha ruh. Namar ka jaid jong ki ka ïapher iwei na iwei. Kumta kim sngew sang eiei haba ki ïa ieit hapdeng jong ki, namar ba ïapher ki jaid. Hynrei ki khlem da wad bniah ba ki ioh symbai na ki jaidbynriew aiu. Hynrei ynda ki la ïa shongkha hapdeng jong ki ki la ïa shongkha shipara, namar la pynkha ïa ki da uwei u briew (Kpa). Hynrei shu ïapher tang ki kmie ba kha ba kha ïa ki.
Hato kane kam dei kaba longsang bad kaba sniew tam ha kaba shipara trai ki ïapoi ban ïa shongkha ki dei na u juh u kpa ba ai symbai. Kane kan wanrah jingsniew ha ka jaitbynriew jongngi lada ngi shu bud beit ïa kane ka dustur ai jaid sha ka kmie. Hynrei lada ai jaid sha u kpa te tip shai ba ki dei shipara na ujuh u kpa. Kumta kim lah ban ïa poi kha da lei lei ruh. Kumta to da wad bniah shuwa shaphang u kpa bad ka kmie ym tang ban shu hun tang ba ïapher ka jaid ka kynja. Da wad dei u kpa jong ki ym ban shu hun ïa tang ha ka jaid jong ka kmie ioh ïa poi kha shipara.
C. B. Iawphniaw
