Amlarem, K’Lyngkot 19
Ka One Soul UNT, Pdengkarong bad ka Rymbai Shkenshynriah SC ki la khur jingjop ha ka lympung ïalehkai ’12th Secondary School Football Knock-out Tournament’ ba la pynïaid da ka Dorbar Shnong Pdengshakap.
Ha ka jingïalehkai kaba nyngkong ka One Soul Unt, Pdengkarong ka la jop ïa ka Demthring SC da 2-0 kol. Ïa kine la thep da u Marshial Nongrum ha ka minit 42 bad u Mario Surong ha ka minit ba 44.
Ha ka jingïalehkai kaba bud, ka Rymbai Shkenshynriah ka la jop da 2-1 kol ïa ka Chirupdeilang FC. Ka Chirupdeilang ka la pynkhih jar nyngkong lyngba u Saimi Dkhar ha ka minit kaba 9. Hynrei ka Rymbai ka la pynphai kylla ar kol lyngba u Niwano Bareh ha ka minit 11 bad u Sarious Bareh (29).
Kane ka lympung kan bteng biang ha ka 24 tarik hapdeng ka Kur Suchen United FC pyrshah ïa ka Kemidon FC ha ka por 12 baje mynsngi, katba ka Sengkhihlang FC ïa ka Siangkhnai FC ha ka por 2 baje nohphai sngi.
