Islamabad, K’lyngkot:
U Mir Yar Baloch, u nongïalam ba pawkhmat jong ki Baloch bad u nongïakhih ïa ka hok longbriew manbriew ha katei ka nongbah, u la ther tyngeh ïa ka Pakistan, da kaba kynnoh ba ka Islamabad ka la pynpra ïa ki jakamane Muslim ‘mosque’ kiba bun ha ka nongbah Balochistan jong katei ka ri. U Baloch u la kdew ba katba ka Islamabad ka la kynnoh ïa ka India ba ka la peit bniah ïa ki jakamane kiba don hapoh Jammu & Kashmir (PoJK) kaba hap hapoh ka jingsynshar jong ka Pakistan, ki shipai ka Pakistan pat ki la pynjulor ym duna ia 40 tylli ki jakamane Muslim ha Balochistan.
Kane ka jingkren jong u Mir Baloch ka long kum ka jubab halor ka jingkynthoh ka Pakistan halor ka rai jong ka sorkar India ban pynithuh ia ki jakamane Muslim, ki Imam bad ki komiti kiba don ha kylleng jong ka Kashmir. Ha katei ka kyrwoh, la ong ba ka tnat kam bar ri jong ka Pakistan, ka ong ba ka jingwan rung ha ki kam niam, ka long ka jingpynkheiñ kaba jur ia ka hok ba kongsan jong ka jinglaitluid ha ka niam bad jingngeit jong katei ka ri.
Haba kynthoh ïa ka jingbitar khlem nongrim jong ka Islamabad, une u nongïalam Baloch u la ong ba ka Pakistan ka dei ka “ri lehnoh” bad ka donkti ha ka ban “pynshitom beiñ ïa ki jaitbynriew Hindu, Sikh, Khristan bad kiwei de ki jaitbynriew rit paid kiba don ha kane ka ri.”
“Ka Republic of Balochistan ka ieng pura halor ka nongrim ba kongsan jong ka ri haba iadei bad ka PoJK… Ka Pakistan kam lah ban ai jinghikai ïa ka Bharat, Balochistan, Afghanistan bad kiwei kiwei halor ki hok jong ki rit paid haba ki shipai jong ka ki pyndonkam ïa ki riew lehnoh niam bad ki lehnoh jihadist kum ka atiar ban pynshitom bad pyntieng ïa ki Hindu bad kiwei kiwei ki jaidbynriew rit paid,” u la ong ha ka jingthoh jong u.
U Mir Baloch, u la kdew ruh ba ki “bor ba nabar” jong ka Pakistan, ki la pynjot ia jan 40 tylli ki mosque ha Republic of Balochistan, kaba kynthup ia ka jingbthei bom beit beit ia ki mosque, ka jingthang ia ka Quran bad ka jingrahbor ia u khlieh jong ki mosque.
