Shillong, K’Lyngkot 20
Ka long ka khubor kaba sngwkmen bad kaba sngewsarong ïa ka thaiñ South West Khasi Hills, ha kaba u samla Ïalamlynti Rngaid na Dirang, Ranikor Civil Sub-Divison u la long uba nyngkong eh napoh ka district ban pass ïa ka AFC C-Licence ba la pynïaid da ka All India Football Federation (AIFF) kaba la long naduh ka 28 tarik u Naiwieng 2025 haduh ka 9 tarik u Nohprah 2025 ha Minerva Football Academy Punjab.
Une u samla uba ju ieid ïa ka jinglehkai phutbol bad don ruh ka jingthrang naduh dang khynnah ban kyntiew ïa ka jngïalehkai phutbol ha ka thaiñ, u la trei shitom bad pynurlong ïa kane ka jingangnud jong u, watla u dei ban ïaid shibun ki jingeh khamtam ba u wan na ka longïing kaba duna ha ka ïoh ka kot.
Haba ïakren bad u nongthoh khubor, u samla Ïalam u la ïathuh ba napdeng ki 17 ngut kiba la ïaleh ïa kane ka examin, kiba pass ki long tang 8 ngut na baroh ka ri India bad ula ïathuh ruh ba u dei tang ma u marwei uba la pass napoh ka Jylla.
