Shillong, K’Lyngkot 20
Ka Meghalaya Athletics Association (MAA) ka la sei haduh 12 ngut ki nongïalehkai ki ban mihkhmat ïa ka Jylla sha ka 60th National Cross Country Athletics Championship ka ban long ha Ranchi Jharkhand naduh 24 tarik mynta u bnai.
Kumba ka paw kiba bun na kine ki nongïalehkai ki dei kiba dangdon ha ka jingpynkhreh na ka bynta ka National Games 2027 bad la khmih lynti ba kin lah ban ïalehkai bha na ka bynta ban wanrah burom ïa ka Jylla.
Halor kane ka jingleit shim bynta sha Ranchi, ki khubor na katei ka synjuk ki la ïathuh ba la sdang ka jingkilanmet naduh ka 10 tarik mynta u bnai bad ki la mih na ka nongbah ha ka sngi Ba-ar.
Kine ki nongïalehkai ki kynthup ïa u Kresstarjune Pathaw, Teibok -lang Biam, Monas Bongrung, Ïohborlang Nongspung, Marshal Wanñiang bad u Hasebinson Marweiñ. Katba ha ka liang ki kynthei ki long ka Balarisha Thyrniang, Daplin Wahlang, Phyrnai Kyndait, Bethylene Grace Makri, Balasiew-dor Pathaw bad ka Marqueenless Ramsiej.
Ïa kane ka kynhun la ïalam da ar ngut ki coach jong ka tnat ïalehkai ka Sorkar Jylla kata u Bah Benningstar Lyngkhoi bad ka Threza A Sangma.
Te kumta na ka liang ka Meghalaya Athletics Association ka la ai khublei kitbok ïa kane ka kynhun ba kan lah ha ka ban ïalehkai bha ha katei ka lympung.
