Shillong, K’Lyngkot 21
Ka Meghalaya Police (MLP) ka la pynliem noh ïa ka Nongkseh da 172 run ha ka lympung ïalehkai First Division Cricket League 2026 ba la pynïaid da ka Shillong Cricket Association ha ka sngi Palei.
Ha kane ka jingïakhun kaba long ha madan jong ka MCA kaba ha Polo, ka MLP kaba la shimti ban tied nyngkong ha kaba ka la kamai 259 run bad shah pynkhyllem baroh ki nongtied ha ki 40 over. U Henry D Sangma u la khyrwit ïa ka shiteng spah kaba 63 run na ki 37 bol bad Ranjit Roy u la ïoh 41 run na ki 59 bol. Katba u Banphira Basaïawmoit u la khur 3 wiket bad ïa ki 2 wiket la ïoh da u Sandy Kharshandy.
Ka Nongkseh kaba la wan beh ïa ka thong ba la buh da ka liang pyrshah, ka la shah pynkhyllem baroh ki nongtied bad kamai tang 87 run ha ki 24.2 over. U Badap Tynsong u la tied 23 run na ki 20 bol bad u Dee Rani u la ïoh 14 run na ki 39 bol. Katba u Pankaj Roy u la khur 5 wiket bad ïa ki 2 wiket la ïoh da Alvin Bamon. Ïa ka nam Player of the Match la khur da u Pankaj Roy.
