Ki Kmie ki Kpa ki kwah ïa ki khun ban long tip sngi, tip akor tip burom, tip briew tip Blei bad ban kiar na ki jingsniew baroh. Ki jingsneng jingkraw ba ioh na iMei iPa katno ki long kiba shongkhia haduh katta katta. Ngi ngeit iwei pa iwei na ki longïing longsem ki ioh ia ka jingsneng iMei iPa naduh ba ngi dang rit haduh ba ngi la heh la san.
Hynrei ka long kaei kaei ka bym lah ban batai ha ki khun kane ka juk ba mynta, kim da sngewtynnad bad sngew bang ïa ki jingsneng jingkraw ne jingbtah ki kmie ki kpa, watla ki long kiba dei bad kiba kordor haduh katta katta na ka bynta jong phi ki khun. Ki khun mynta ki ong ba kam dei shuh ka por kum ba mynshuwa, mynta ka la kylla. Kumta kim da patiaw than eh ïa ki jingsneng jingkraw jong ka kmie bad u kpa. Ki ïaid ha la ka mon bad kim ju kham sngap bad shah shkor bha bad ki ong ba ki kmie ki kpa ki long kiba biej. Kumno keiñ ban ngin shu koh-nguh ïa ki jingsneng jongki.
Te, to lada ym don jingjia ei ei ne la kynduh jingeh ha ka jingim jong ki, ki kmen ki sngewbha. Hynrei haba ki ïakynduh jingeh ha ka jingim bad jinglong briew jong ki kin sa babe bad pyrto kylla ïa ki jingsneng jingkraw jong ka kmie u kpa.
Namar lada ngim sngap ïa ki jingsneng jong ki kmie ki kpa kan poi ka por ba ngin babe kylla ynda ki kmie ki kpa kim don shuh ha kane ka pyrthei. Kin sa ong bad kynmaw ïa ki jingsneng i Mei i Pa ki long kiba dei shisha hynrei ym lah leh eiei shuh ka por ka la dier ba ngi la tam sneng ïa ki kmie ki kpa. Kumta ngi dei ban kohnguh ïa ki jingsneng jong i Mei i Pa bad ngim dei ban saitlah haba ki pyni khamtam ïa ka jingbha ba ngin leh ha ka jingim. Kumta kiar na ka sngewmeng sngew stad bad saitlah ïa ka kmie u kpa. Dei ban burom bad ñiewkor ïa ki kmie ki kpa na ka bynta ka jingbha jong-ngi hi. Kumta ngi dei ban im tip briew tip Blei ha kane ka pyrthei.
C. B. Iawphniaw
