Jowai, K’Lyngkot 21
Kum shim bynta ban rakhe ïa ka jingïoh Jylla ba pura, ka West Jaiñtia Volleyball Association (WJVA) ka la pynlong ïa ka lympung ïalehkai 1st Meghalaya Day Open to All Tournament ha ka sngi Balang ha madan Biar ka Blai, Biarskur, Lion Mission Compound, Jowai.
Ha kane ka lympung la wan shim bynta da 10 tylli ki kynhun ïalehkai kynthup 7 tylli ha ka liang ki shynrang bad 3 tyli ha ka liang ki kynthei.
Ha ka liang ki shynrang la hap ban pynïakhun da rukom ïalehkai jong ka ‘knockout’, katba ha ka liang ki kynthei namar ka jingduna ki kynhun ba ïashim bynta la pynïakhun da ka League.
U President ka WJVA Bah Lamat O Laloo ula ïathuh ba ka West Jaiñtia Volleyball Association (WJVA) ka dei ka synjuk kaba dang shu seng thymmai hadien ba la sakhi ïa ka jinglah ban ïalehkai bha ha ka 6th Meghalaya Games 2025 kaba la long ha nongbah Jowai.
U Bah Laloo ula pynpaw ruh ka jingsngewnguh ïa ki nongkyrshan bad ki dkhot ka synjuk kiba la noh synñiang ban pynbit pynbiang ban pynlong ïa kane ka lympung.
Ha ka sngi sdang jong ka jingïalehkai, ha baroh ar ki kynhun la jop da ka ATS-NEAU.
Ha ka liang ki shynrang ka ATS-NEAU ka la pynliem noh ïa ka Lamare Nartiang da 25-22 bad 25-9. Katba haka liang ki kynthei ka ATS-NEAU ka la jop ïa ka ATG-Girls da 25-22 bad 25-14.
