Shillong, K’Lyngkot 21
Ka kynhun ïalehkai ka Jylla ka la long ba la pynkhreh na ka bynta ka wat kaba khatduh jong ka 79th Senior Men’s National Football Championship na ka bynta ka Santosh Trophy 2025-26 ha kaba kan sdang da ka jingïakhun pyrshah ïa ka Odisha ha ka sngi Palei ha ka por 2 baje nohphai sngi ha Silapathar Football Stadium kaba ha Assam.
Kane ka Group-B ka dei kaba kham eh bad kaba kham jwat bha namar ka kynthup lang ïa ki saw tylli ki kynhun kiba la rah teng ïa ka nam lahduh bad kiba wan ba-ar. Ka Punjab ka dei ka kynhun kaba la jop ïa ka Santosh Trophy haduh phra sien bad wan ba-ar ruh haduh phra sien. Ka Kerala ka dei kaba la jop hynñiew sien bad haduh khyndai tylli ki rekod ïa ka nam lahduh bad wan ba-ar. Ka Services ka la jop ïa ka hynñiew sien bad wan ba-ar san sien. Ka Railways ka la jop ïa ka lai sien bad ka la long kaba ar hynriew sien. Ka Meghalaya ka la wan ba-ar shisien, katba ka Odisha ka dei tang ma ka ka kynhun kaba khlem pat poi shaduh ka phainal.
Ka jinglah ban ïalehkai bha ka Meghalaya ka dei ha u snem 2022-23 ha kaba ka la shah rem ha ka Karnataka ha ka final. Ïa kane ka kynhun la ïalam da u Bah Khlaiñ Pyrkhat Syiemlieh bad ha kane ka kynti kaba mynta u la shimti biang ïa kane ka kynhun.
Kumba ka paw ki nongïalehkai jong u, kim shym la lah ban ïalehkai bha ha ka ‘preliminary’ kaba la long ha u bnai ba la lah, ha kaba ka la shah rem ha ka Sikkim da 2-1 kol shwa ba kan pynliem ïa ka Arunachal Pradesh da 2-1 kol. Hynrei kane ka jingjop ka la biang pura ba kan ïoh rung sha ka wat kaba khatduh lyngba ka jingïapher ha ka jingthep kop.
Ha kane ka kynti kaba mynta ka Jylla ka la duh ïa ki katto katne ngut ki rangïalehkai kiba la leit ïasoh sha kiwei pat ki klob shabar jylla bad katto katne ki dangdon ha ka jingpynkhreh jong ka Nongkseh na ka bynta ka jingïakhun final ha ka sngi Palei ha Sikkim.
Ki saw tylli ki kynhun ki ban wan ha ki kyrdan ba hakhlieh ha kawei pa kawei ka group kin ïoh rung sha ka quarter final. Te kumta kane ka kynhun jong u Bah Khlaiñ ka donkam ban ïakhun tyngeh pyrshah ïa ka Odisha.
Ki kyrteng ki rangïalehkai ka Jylla ki long u Rajat Paul Lyngdoh, Banshanskhem Kharsyntiew, Nister Roy Suting, Wanboklang Lyngkhoi, Apborlang Kurbah, Wilbert D Mar-baniang, Ïohborlang L Lyngkhoi, Mebanaibok Kharbudnah, Richie Kharbani, Mebankhraw K. Wah-lang, Rimankhraw Kharumnuid, Riborlang L Lyngkhoi, Babysunday Marngar, Dibormi Kassar, Meban-shngain Kurkalang, Fairming Suting, Robertson M Khongriah, Hardy Cliff Nongbri, Kynsaibor Lhuid, Marbiangki Suchiang, Dei-bormame Tongper bad u Dawan -chwa C Challam.
Ki nongïarap ki long u Bah Khlaiñ Pyrkhat Syiemlieh (Head Coach), Sailon Syngkrem (Assis -tant Coach), Dious Lapasam (Manager) & Wanbokstar Syiemïong (Physio).
