Shillong, K’Lyngkot 21
Ki riew ieid phutbol kin ïoh ban sakhi ïa ki kynhun ba paw ka pyrthei ha kaba ka Qatar ka dangpynkhreh ban pynlong ïa ka Qatar Football Festival 2026, ka ban long naduh ka 26 haduh ka 31 tarik u Lber.
Kane ka lympung kan kynthup ïa ka jingïalehkai jong ka Finalissima 2026 hapdeng ka lahduh jong ka World Cup 2022 ka Argentina bad ka Spain ha kaba yn ïohi ïa u Lionel Messi u ban ïakhun pyrshah ïa u khlur ïalehkai ba dangkhynnah ka Spain u Lamine Yamal.
Ka Local Organising Committee (LOC) jong katei ka tamasa ka la pynpaw ba kan wanrah ïa ki katto katne tylli ki kynhun ïalehkai ba paw jong ka pyrthei na ka bynta hynriew tylli ki jingïalehkai kiba itynnad.
Nalor kitei ki kynhun, ka Qatar, Saudi Arabia, Egypt, bad Serbia kin ïashim bynta ha katei ka lympung ïalehkai bar ri ba la pynwan dur khnang ban ïarap ïa ki kynhun ban ïatynjuh bor ïa ki rukom ïalehkai jong ki hashwa ka FIFA World Cup 2026.
Ïa katei ka Finalissima yn pynlong ha ka 27 tarik u Lber ha Lusail Stadium.
Ka lahduh jong ka Copa America, ka Argen -tina kan ïakhun pyrshah ïa ka lahduh ha Europe, ka Spain ha kaba ïadon lang ki khynnah ïalehkai bapaw jong kine ki ri.
Ïa katei ka tamasa yn sdang ha ka 26 tarik Lber ha kaba ka Egypt kan ïakynduh pyrshah ïa ka Saudi Arabia ha Ahmad bin Ali Stadium, katba ka Qatar ïa ka Serbia ha Jassim bin Hamad Stadium ha katei kajuh hi ka sngi.
Kine ki jingïalehkai kin bteng haduh ka 30 tarik u Lber ha kaba ka Egypt kan ïakynduh pyrshah ïa ka Spain ha Lusail Stadium bad ka Saudi Arabia ïa ka Serbia ha Jassim bin Hamad Stadium.
Kane ka tamasa kan kut ha ka 31 tarik u Lber da ka jingïakhun kaba paw hapdeng ka Qatar bad ka Argentina ha Lusail.
Ïa ki tiket na ka bynta ki jingïalehkai yn sdang ban die naduh ka 25 tarik u Rymphang lyngba ka roadtoqatar(dot)qa. Na ka bynta ki nongkyrshan kiba wan nabar, yn lah ban ïoh ïa ki jingleit jingwan ba kyrpang (special travel packages) naduh ka 1 tarik u Rymphang, kaba la thaw ha ka jingïatreilang bad ka Visit Qatar bad ka Qatar Airways.
