Nongstoiñ, K’Lyngkot 22
Ka ophis jong ka District Social Welfare Officer, West Khasi Hills District bad ka District Administration, Nongstoiñ, West Khasi Hills District ryngkat ka jingïatreilang bad ka Artificial Limbs Manufacturing Corporation of India (ALIMCO), ka la pynlong ïa ka Samajik Adhikarita Shivir (SAS) hapoh ka Ministry of Social Justice & Empowerment jong ka Sorkar India, na bynta ki tymmen (Senior Citizens) bad kiba don jingduna dkhot met (Divyangjan) ha Vanni Hall, St. Peter’s, Pyndengrei, Nongstoiñ, West Khasi Hills District.
Ïa kane ka prokram la pynlong hapoh ka Rashtriya Vayoshri Yojana (RVY) bad ka Assistance to Disabled Persons (ADIP) Scheme, bad la bei pisa da ka Sorkar Pdeng lyngba ka Senior Citizens Welfare Fund.
Ka jingthmu ka long ban kyrshan ïa ki tymmen (60 snem shaneng) kiba shah ktah ha ki jingduna ba la wan na ka rta kum ka jingduna ha ka bor ïohi, jingduna bor ïohsngew, jingduh noh ïa ki bniat bad jingduna ha ka ïaid ka ïeng, ha kajuh ka por, kiba don jingduna ha ka met ka phad (Divyangjan) ruh la ai jingïarap katkum ki kyndon jong ka ADIP Scheme.
Shuh shuh ha kane ka sngi haduh 1166 ngut ki nongïoh jingïarap na ki block bapher bapher jong ka West Khasi Hills District ki la ïoh jingïarap lyngba kane ka prokram, kiba kynthup ïa ki tymmen ba la palat 60 snem kiba dei ki BPL lane kiba ka jingïoh ha ka shi bnai ka long T.15,000 katkum ki kyndon jong ka scheme.
Nangta, la ïoh ban sam ïa bun jait ki tiar jingïarap kum ki tiar ïarap ban ïaid, ki tiar ïarap ïa ka bor ïohsngew, ki ïit-khmat, la ai ruh ïa ki tiar kyrpang kum wheelchair commodes, spinal support bad knee braces.
Shuh shuh la ong ba ka ALIMCO kan ai ka jingsumar bad jingïarap khlem dor haduh shi snem, bad na bynta ki tymmen ba la palat 80 snem, ïa ki tiar jingïarap yn leit buh sha ki ïing jong ki.
Ha kane ka sngi u Bah Methodius Dkhar, Myntri Sorkar u la long u kongsan ha ka jingdonlang u Bah Gabriel Wahlang, MLA ka Nongstoiñ kum u symbud kongsan, ka Hema Nayak, IAS, Deputy Commissioner, West Khasi Hills District bad kiwei kiwei.
U Bah Methodius Dkhar haba kren kum u kongsan ha kane ka sngi u la kyntu ïa ki nongïoh jingïarap ban pyndonkam bha ïa ki tiar jingïarap ba la ai. U la ong ruh ba kane ka prokram kam dei tang ka kam jong ka Sorkar hynrei ka dei ka jingkitkhlieh jong ka imlang sahlang baroh kawei.
Kiwei kiwei kiba ïadonlang ha kane ka sngi ki kynthup ïa ka Kong D Pakyntein, District Social Welfare Officer (DSWO), u Dr. Z Marak, Medical Superintendent, Dr. W Sutnga, Specialist Office DMHO, u Shangsu Sengupta Manager, ALIMCO, Guwahati, Kong C Kharbhih DSEO, Bah T Kyndiah DCPO, Fr. Marius Thongni Parish Priest, Pyndengrei Parish, ryngkat bad kiwei pat ki ophisar jong ka district.
